ភាពអសកម្មរបស់លោកអធិការ ប៊ន សំអាត គួរត្រូវបានក្រសួងមហាផ្ទៃចុះធ្វើអធិការកិច្ចឲ្យបានស៊ីជម្រៅម្តងហើយ

By មនសិការខ្មែរ On February 16, 2013 In ព័ត៌មានស៊ើបអង្កេត No Comments

ក្នុងចំណោមអធិការនគរបាលខណ្ឌទាំង៩ ចំណុះឲ្យស្នងការដ្ឋាននគរបាលរាជធានីភ្នំពេញ គឺមានតែលោក ប៊ន សំអាត អតីតជាអធិការនគរបាលខណ្ឌដង្កោ ហើយក្រោយមកត្រូវបានតែងតាំងជាអធិការនគរបាលខណ្ឌពោធិ៍សែនជ័យ គឺជាអធិការនគរបាលដែលមានរឿងអាស្រូវច្រើនជាងគេ និងធ្លាប់មានពាក្យបណ្តឹងដាក់ចូលដល់សាលាដំបូងរាជធានីភ្នំពេញរាប់សិបករណី។ ក្នុងនោះលោកអធិការ ប៊ន សំអាត ដែលអមដំណើរដោយលោកអធិការការរងម្នាក់ទៀត ធ្លាប់បានចូលទៅបំភ្លឺពាក្យបណ្តឹងនៅសាលាដំបូងរាជធា នីភ្នំពេញ ទាក់ទិនបទព្រហ្មទណ្ឌលើ ការបង្ខាំងមនុស្សខុសច្បាប់ និងបទរំលោភសិទ្ធិបុគ្គលផងដែរ គឺជាពាក្យបណ្តឹងរបស់អ្នកកាសែតម្នាក់ដែលត្រូវនគរបាលខណ្ឌដង្កោ ធ្វើទុក្ខបុកម្នេញ។ ក្នុងរយៈពេលចុងក្រោយនេះ លោក ប៊ន សំអាត ត្រូវរងនូវការ ចោទប្រកាន់ពីបទលួចគាស់ផ្ទះប្រជាពលរដ្ឋរឹបអូសយកឈើប្រណីតដ៏មានតម្លៃចំនួន៣សន្លឹក និងម៉ូតូចំនួន២គ្រឿង ដោយគ្មានការឆ្លងយោបល់ពីស្នងការនគរបាលរាជធា នីភ្នំពេញ ក៏ដូចជាគ្មានការឯកភាពពីព្រះរាជអាជ្ញា អាចចាត់ទុកជាកំ ហុសឆ្គងដ៏ធ្ងន់ធ្ងរ ដែលទាមទារឲ្យអគ្គស្នងការនគរបាលជាតិ និងក្រ សួងមហាផ្ទៃ ត្រួតពិនិត្យមើលបញ្ហានេះឡើងវិញជាបន្ទាន់។

បើតាមមន្ត្រីតូចតាចមួយចំនួនបានបង្ហើបឲ្យដឹងថា សកម្មភាពដែល លោក ប៊ន សំអាត បានទៅគាស់ផ្ទះពលរដ្ឋនៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យទាំងយប់ ដោយគ្មានដីកាបង្គាប់របស់តុ លាការ និងបទបញ្ជារបស់ស្នងការនគរបាលរាជធានីភ្នំពេញ គឺរឹបអូសបានឈើប្រណីតចំនួន ៣ សន្លឹក ដែលក្នុងមួយសន្លឹកមានកម្រាស់១តឹក មានទទឹងប្រវែង១ម៉ែត្រ និងបណ្តោយ៣ម៉ែត្រ ហើយបើគិតជាសាច់ប្រាក់វិញ គឺឈើមួយសន្លឹកនោះ មានតម្លៃជាង១ម៉ឺនដុល្លារអាមេរិក។ ក្នុងនោះក៏មានការរឹបអូសយកម៉ូតូចំនួន២គ្រឿងផងដែរ ហើយ ដោយសារតែលោក ប៊ន សំអាត ប្រើអំណាចនិងច្បាប់ព្រៃយ៉ាងសាហាវឃោរឃៅពេក ក្នុងភូមិសាស្ត្រដែលគាត់កាន់កាប់ ធ្វើឲ្យម្ចាស់ផ្ទះមិនហ៊ាន ប្តឹងតវ៉ាពីករណីនេះទេ ប៉ុន្តែវាជាចំណាត់ការខុសឆ្គងមួយដែលអគ្គស្នងការនគរបាលជាតិមិនត្រូវបណ្តែតបណ្តោយឲ្យលោក ប៊ន សំអាត ធ្វើអ្វីៗតាមតែអំពើចិត្តនោះទេ។

បើតាមព័ត៌មានខ្សឹបខ្សៀវពីមន្ត្រីតូចតាចមួយចំនួនបានឲ្យដឹងទៀតថាឈើប្រណីតពេញខ្នាតចំនួន ៣សន្លឹកដែលរឹបអូសបានតាមមធ្យោ បាយឆក់ប្លន់នោះអាចត្រូវលោក ប៊ន សំអាត យកទៅលក់ហើយបែងចែកជា៣ចំណែកធំៗ គឺអាចទុកឲ្យលោក ស្នងការ១សន្លឹក លោក ប៊ន សំអាត ១សន្លឹក ឬអាចបែងចែកឲ្យថ្នាក់អ ភិបាលខណ្ឌ១សន្លឹកទៀតក៏មិនដឹង ដើម្បីកុំឲ្យមានរឿងរ៉ាវវែងឆ្ងាយ។ កន្លងមកលោក ប៊ន សំអាត ចេះតែធ្វើអ្វីៗតាមអំពើចិត្តក្នុងការកសាងឯកសារមិនប្រក្រតី កាឡៃពីសទៅជាខ្មៅក្នុងការដាក់ទោសទណ្ឌទៅលើជនស្លូតត្រង់យ៉ាងអមនុស្សធម៌បំផុត គឺគ្រប់ករណីដែលមន្ត្រីនគរបាលក្រោមបញ្ជារបស់លោក ប៊ន សំអាត មិនអាចបង្ខំឲ្យជនស្លូតត្រង់បង់លុយតាមតែការទាមទាររបស់ពួកគេ គឺពួកគេចេះតែមានឱកាសកសាងឯកសារតាមរបៀបប្រឌិតរឿង ធ្វើឲ្យជនស្លូតត្រង់មានទុក្ខទោស ហើយបញ្ជូនមកកាន់សាលាដំបូងរាជធានីភ្នំពេញ ដែលត្រង់ចំណុចនេះ គេមិនច្បាស់ទេថា តើលោក ជីវ កេង ដែលជាប្រធានសាលាដំបូងរាជធានីភ្នំពេញ ធ្លាប់បានត្រួតពិនិត្យសំណុំរឿងឬភស្តុតាងដែលនគរបាលខណ្ឌពោធិ៍សែនជ័យ ក្រោមបញ្ជារបស់លោក ប៊ន សំអាត បញ្ជូនមក ឬក៏យ៉ាងណានោះឡើយ។ សូម្បីតែករណីពលរដ្ឋដាក់ពាក្យបណ្តឹងពាក់ព័ន្ធនឹងអំពើល្មើសព្រហ្មទណ្ឌដែលលោក ប៊ន សំអាត បានប្រព្រឹត្តក៏គេមិនដែលឃើញស្ថាប័នតុលាការចាត់វិធានការស្រាវជ្រាវស៊ើបអង្កេត ហើយ បានស៊ីជម្រៅនោះដែរ មិនដឹងជាមានរឿងអាថ៌កំបាំងអ្វីនោះទេ។

កន្លងមកក៏ធ្លាប់មានលេចឮរឿងរ៉ាវមិនប្រក្រតីជាច្រើន ដូចជាករណី ដែលលោក ប៊ន សំអាត បានប្រើប្រាស់មន្ត្រីនគរបាលមួួយចំនួនឲ្យពាក់ឯកសណ្ឋានជានគរបាលចរាច រណ៍ចុះឈរជើងតាមផ្លូវសាធារណៈដើម្បីចាប់យកម៉ូតូឬជំរិតទារលុយអ្នកដំណើរផ្ទុយពីគោលការណ៍របស់អគ្គស្នងការនគរបាលជាតិ គឺមន្ត្រីនគរបាលដែលគ្មានជំនាញ ហើយពាក់ឯកសណ្ឋានជានគរបាលចរាចរណ៍ទាំងនោះបានចេញរកប្រាក់យក ទៅជូនលោក ប៊ន សំអាត។ នៅពេល មានការបែកធ្លាយរឿងនគរបាលច រាចរណ៍វាយ ឬគាបជំរិតអ្នកដំណើរផ្ទុយពីគោលការណ៍ អគ្គស្នងការនគរបាលជាតិ ក៏បានចេញរថយន្តល្បាតតាមផ្លូវជាញឹកញាប់ដើម្បីពិនិត្យមើល សកម្មភាពនគរចរាចរណ៍ ហើយនៅពេលធ្វើដំណើរទៅដល់ខណ្ឌពោធិ៍សែនជ័យ អគ្គស្នងការនគរបាលជាតិ បានឃើញនគរបាលចរាចរណ៍ទាំងនោះ ធ្វើសកម្មភាពយ៉ាងប្រសេចប្រ សាចតាមដងផ្លូវ ដែលឯកសណ្ឋានទាំងនោះមិនគ្រប់លក្ខណៈ ក្នុងផែននគរបាលចរាចរណ៍ ទើបអគ្គស្នងការ នគរបាលជាតិសួរនាំទៅផ្នែកពាក់ព័ន្ធ ហើយក៏បែកធ្លាយរឿងអាស្រូវ ដែល លោក ប៊ន សំអាត យកនគរបាលដែលគ្មានជំនាញទៅពាក់ឯកសណ្ឋាន ជានគរបាលចរាចរណ៍ ចាប់យកម៉ូតូពលរដ្ឋនិងជំរិតទារលុយតាមដងផ្លូវយ៉ាងអនាធិបតេយ្យបំផុត។

ពាក់ព័ន្ធនឹងករណីនេះ អភិបាលរាជធានីភ្នំពេញ ក៏ដូចជាលោកស្នងការនគរបាលរាជធានីភ្នំពេញ ធ្លាប់បានកោះហៅលោក ប៊ន សំអាត ទៅណែនាំឲ្យបញ្ឈប់សកម្មភាពប្រើប្រាស់នគរបាលដែលគ្មានជំនាញឲ្យពាក់ឯកសណ្ឋានជានគរបាលចរាចរណ៍ដែលមិនគ្រប់លក្ខណៈ ក្នុងការគាបជំរិតឬចាប់យកម៉ូតូប្រជាពលរដ្ឋទៅរក្សាទុកក្រោមលេសត្រួតពិនិត្យសុវត្ថិភាពចរាចរណ៍។ ក្នុងករណីជាច្រើនម៉ូតូដែលនគរបាលក្រោមបញ្ជារបស់លោក ប៊ន សំអាត ចាប់យកទៅ គឺគេចាត់ចែងតាមតែអំពើចិត្តដែលពេលខ្លះមានទាំងលក់ដូរទៅទៀត ពេលថ្នាក់លើសួរនាំឬសុំឲ្យបញ្ជូនម៉ូតូនិងសំណុំឯកសារទៅកាន់ផ្នែកជំនាញចរាចរណ៍ក្រុង គេសង្កេតឃើញលោក ប៊ន សំអាត រកលេសដើម្បីគេចវេះមិនបញ្ជូនវត្ថុតាងទាំងនោះ ទៅឲ្យថ្នាក់លើទេព្រោះ វាមានអាថ៌កំបាំងជាច្រើនដែលអាចបែកធ្លាយនៅពេលវត្ថុតាងទាំងនោះធ្លាក់ដល់ដៃថ្នាក់លើ។
សូមបញ្ជាក់ថា ឲ្យតែយុវជនដែលធ្វើដំណើរចេញពីរៀនសូត្រនៅពេលយប់ទៅកាន់ផ្ទះសម្បែងវិញ ឬប្រជាពលរដ្ឋដែលមានការចាំបាច់ត្រូវជិះម៉ូតូចេញចូលផ្ទះនៅពេលយប់ គេសង្កេតឃើញកម្លាំងនគរបាលរបស់លោក ប៊ន សំអាត ធ្វើទុក្ខបុកម្នេញចាប់វាយខ្នោះ និងរឹបអូសយកម៉ូតូដែលពេលខ្លះប្រជាពលរដ្ឋសឹងមិនហ៊ានទៅយកម៉ូតូវិញទេ ដោយសារក្រុមនគរបាលរបស់លោក ប៊ន សំអាត បានប្រមាថចាប់ដាក់គុក ឬវាយខ្នោះទៅតាមតែទំនើងចិត្ត ហើយពួកគេក៏មានជំនាញកសាងឯកសារទៅកាន់សាលាដំបូងរាជធានីភ្នំពេញ ដោយប្រឌិតរឿងធ្វើឲ្យជនស្លូតត្រង់មានទុក្ខទោសសឹងរាប់ភ្លេចទៅហើយ៕