MoneaksekarMoneaksekar

ការបោះឆ្នោតរើសមេដឹកនាំល្អជារឿងសំខាន់បំផុតសម្រាប់ប្រជាពលរដ្ឋខ្មែរ

មនសិការខ្មែរ — Sun, 19 May 2013 05:27:06 +0000

ការបោះឆ្នោតជាតិអាណត្តិទី៥ ថ្ងៃទី២៨ ខែកក្កដា ឆ្នាំ២០១៣ កាន់តែខិតជិតចូលមកដល់ ហើយប្រជាពលរដ្ឋខ្មែរនៅទូទាំងប្រទេសភាគច្រើនបានត្រៀមខ្លួនរួចជាស្រេចដើម្បីទៅបោះឆ្នោតជ្រើសរើសមេដឹកនាំដែលខ្លួនពេញចិត្ត។ ទន្ទឹមនឹងនេះក្រុមអ្នកតាមស្ថានការណ៍នយោបាយក្នុងប្រទេសកម្ពុជាបានអះអាងថា មានតែគណបក្សធំៗពីរប៉ុណ្ណោះដែលជាគូប្រជែងប្រកបដោយឥទ្ធិពល គឺគណបក្សប្រជាជនកម្ពុជារបស់លោក ហ៊ុន សែន និងគណបក្សសង្គ្រោះជាតិរបស់លោក សម រង្ស៊ី។ អ្វីដែលគួរឱ្យកត់សម្គាល់នោះគឺគណបក្សសង្គ្រោះជាតិដែលជាការរួមកម្លាំងគ្នារវាងគណបក្សសមរង្ស៊ី និងគណបក្សសិទ្ធិមនុស្សកំពុងតែទទួលបានការគាំទ្រយ៉ាងខ្លាំងក្លាពីប្រជាពលរដ្ឋខ្មែរនៅទូទាំងប្រទេស និងពីសំណាក់ជនរួមជាតិនៅក្រៅប្រទេស ដូចជាសហរដ្ឋអាមេរិក កាណាដា បារាំង អូស្ត្រាលី និងបណ្តាប្រទេសមួយចំនួនទៀតនៅតំបន់អឺរ៉ុប។ ប្រការនេះហើយដែលធ្វើឱ្យលោក ហ៊ុន សែន និងក្រុមមេដឹកនាំគណបក្សប្រជាជនព្រួយបារម្ភខ្លាចចាញ់ឆ្នោតនៅថ្ងៃទី២៨ ខែកក្កដា ឆ្នាំ២០១៣ ហើយព្យាយាមធ្វើប្រជាភិថុតិទាក់ទាញការគាំទ្រពីពលរដ្ឋទាំងស្លន់ស្លោរហូតដល់មានការវាយប្រហារលើគោលនយោបាយគណបក្សសង្គ្រោះជាតិទៀតផង។ ទង្វើរបស់លោក ហ៊ុន សែន ដែលកំពុងធ្វើឱ្យមានការរិះគន់យ៉ាងខ្លាំងក្លានោះ គឺការលើកឡើងថាអ្នកចង់ផ្តួលរំលំរដ្ឋាភិបាលកំពុងជ្រកនៅក្នុងគណបក្សប្រឆាំង ព្រោះការលើកឡើងបែបនេះជាល្បិចកលអាក្រក់ក្នុងការគំរាមកំហែងលើគណបក្សប្រឆាំងយ៉ាងកំរោល។

មន្ត្រីអង្គការក្រៅរដ្ឋាភិបាលដែលឃ្លាំមើលការបោះឆ្នោតក្នុងប្រទេសកម្ពុជាបានវាយតម្លៃថាសន្ទុះគាំទ្រគណបក្សសង្គ្រោះជាតិកាន់តែមានការកើនឡើងឥតឈប់ឈរ ព្រោះប្រជាពលរដ្ឋភាគច្រើនអស់ជំនឿលើការដឹកនាំរបស់គណបក្សប្រជាជន និងលោក ហ៊ុន សែន ព្រោះរយៈពេលជាង៣៤ឆ្នាំកន្លងទៅនេះគណបក្សប្រជាជនពុំបានធ្វើឱ្យប្រទេសជាតិមានការរីកចម្រើនគួរឱ្យកត់សម្គាល់ឡើយ។ ជាក់ស្តែងក្រោយពេលបោះឆ្នោតជាតិអាណត្តិទី១ ខែឧសភា ឆ្នាំ១៩៩៣ រហូតមកដល់ដើមឆ្នាំ២០១៣នេះ កម្ពុជាទទួលបានជំនួយពីបរទេសជាច្រើនពាន់លានដុល្លារ និងជំពាក់បំណុលបរទេសយ៉ាងច្រើនសន្ធឹកសន្ធាប់ ជាពិសេសបំណុលរបស់ចិនក្លាយជាបន្ទុកធ្ងន់ធ្ងរបំផុតសម្រាប់កូនខ្មែរជំនាន់ក្រោយជាអ្នករ៉ាប់រងសងទៅគេវិញ។ ប៉ុន្តែទោះបីកម្ពុជាទទួលបានជំនួយពីបរទេសជាច្រើនពាន់លានដុល្លារ ហើយជំពាក់បំណុលបរទេសវ័ណ្ឌកយ៉ាងណាក៏ដោយ ក៏ប្រជាពលរដ្ឋខ្មែរប្រមាណ៤០ភាគរយបន្តរស់ក្រោមបន្ទាត់នៃភាពក្រីក្រងើបមិនរួចដដែល។ ចំណែកកំណើនសេដ្ឋកិច្ចប្រចាំឆ្នាំមិនបានបែងចែកប្រកបដោយតម្លាភាពសម្រាប់ប្រជាពលរដ្ឋទូទៅនោះទេ ហើយកំណើនសេដ្ឋកិច្ចប្រចាំឆ្នាំមានតែតួលេខប៉ុណ្ណោះ ក្នុងខណៈដែលនៅឯតំបន់ជនបទមិនទាន់មានការអភិវឌ្ឍហេដ្ឋារចនាសម្ព័ន្ធ ឬសមិទ្ធផលផ្សេងៗស្របទៅតាមសេចក្តីត្រូវការរបស់ប្រជាពលរដ្ឋនៅឡើយ។

ក្នុងខណៈដែលប្រជាពលរដ្ឋខ្មែរភាគច្រើនបង្ហាញនូវជំហរចង់បោះឆ្នោតផ្លាស់ប្តូរមេដឹកនាំនៅថ្ងៃទី២៨ ខែកក្កដាខាងមុខ លោក សម រង្ស៊ី ប្រធានគណបក្សសង្គ្រោះជាតិបានបង្ហាញយ៉ាងច្បាស់អំពីគោលនយោបាយរបស់គណបក្សសង្គ្រោះជាតិ ក្នុងការស្រោចស្រង់ជាតិឱ្យបានទាន់ពេលលវេលា ដើម្បីការពារបូរណភាពទឹកដីឱ្យបានគង់វង្ស និងដើម្បីលើកកម្ពស់ជីវភាពរស់នៅរបស់ប្រជាពលរដ្ឋឱ្យបានប្រសើរជាងមុន។ លោក សម រង្ស៊ី ក៏បានពន្យល់ជនរួមជាតិខ្មែរទូទៅផងដែរ អំពីសារៈសំខាន់នៃការរួបរួមកម្លាំងខ្មែរជាធ្លុងមួយដើម្បីមានឥទ្ធិពលគ្រប់គ្រាន់សម្រាប់ទប់ទល់អំពើរំលោភឈ្លានពីសំណាក់បរទេសជិតខាង។ ជាងនេះទៅទៀតលោក សម រង្ស៊ី បានបញ្ជាក់ប្រាប់ប្រជាពលរដ្ឋខ្មែរទូទៅថា ការបោះឆ្នោតជ្រើសរើសមេដឹកនាំល្អមានសមត្ថភាពពិតប្រាកដ និងមានឧត្តមគតិស្នេហាជាតិទឹកដី គឺជារឿងសំខាន់ណាស់។ លោក សម រង្ស៊ីក៏បានរិះគន់ការដឹកនាំរបស់លោកនាយករដ្ឋមន្ត្រី ហ៊ុន សែន ជាច្រើនអាណត្តិកន្លងទៅនេះដែលមិនបានធ្វើឱ្យប្រទេសជាតិមានការរីកចម្រើន ហើយកំពុងប្រឈមនឹងវិបត្តិសង្គមសព្វបែបយ៉ាងដូចជាអំពើពុករលួយ ការបណ្តេញប្រជាពលរដ្ឋចេញពីដីធ្លី តុលាការមិនឯករាជ្យ និងការបំផ្លាញធនធានធម្មជាតិរួមមានព្រៃឈើ រ៉ែក្រោមដីលើដីជាដើម។ ដូច្នេះមានតែការផ្លាស់ប្តូរមេដឹកនាំប៉ុណ្ណោះ ទើបអាចធ្វើឱ្យប្រទេសកម្ពុជាផ្លាស់ប្តូរទៅរកការរីកចម្រើនបានឆាប់រហ័សដូចប្រទេសជិតខាង និងប្រទេសក្នុងតំបន់។

អ្នកតាមដានស្ថានការណ៍នយោបាយក្នុងប្រទេសកម្ពុជាបានលើកឡើងថាការបោះឆ្នោតជ្រើសរើសមេដឹកនាំថ្មីដែលមានសមត្ថភាពពេញលេញមានឧត្តមគតិស្នេហាជាតិទឹកដី និងស្រឡាញ់ប្រជាពលរដ្ឋគឺជារឿងសំខាន់ណាស់សម្រាប់ប្រជាពលរដ្ឋខ្មែរទូទៅ។ សន្លឹកឆ្នោតរបស់ប្រជាពលរដ្ឋខ្មែរម្នាក់ៗមានតម្លៃខ្លាំងណាស់សម្រាប់ជួយដល់ប្រទេសជាតិ ជួយដល់ខ្លួនឯង និងដើម្បីឱ្យប្រទេសជាតិមានលទ្ធិប្រជាធិបតេយ្យពិតប្រាកដ មានការគោរពសិទ្ធិមនុស្ស និងមានការអភិវឌ្ឍដែលបម្រើផលប្រយោជន៍ប្រជាពលរដ្ឋ។ ក្នុងចំណោមមេដឹកនាំដែលប្រជាពលរដ្ឋខ្មែរត្រូវបោះឆ្នោតគាំទ្រនៅថ្ងៃទី២៨ ខែកក្កដា ខាងមុខនេះគឺលោក សម រង្ស៊ី ប្រធានគណបក្សសង្គ្រោះជាតិព្រោះលោក សម រង្ស៊ី មានជំនាញសេដ្ឋកិច្ចលំដាប់អន្តរជាតិ ហើយមានឆន្ទៈពិតប្រាកដក្នុងការដឹកនាំប្រទេសជាតិឱ្យមានការរីកចម្រើនឆាប់រហ័ស។ ស្នាដៃរបស់លោក សម រង្ស៊ី ពេលកាន់តំណែងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីដើមនៃរដ្ឋាភិបាលអាណត្តិទី១ ជាសក្ខីភាពបញ្ជាក់យ៉ាងច្បាស់ពីសមត្ថភាពរបស់លោក។

ក្រុមអ្នកវិភាគឯករាជ្យមួយចំនួនបានផ្តល់ជាអនុសាសន៍ថាប្រជាពលរដ្ឋខ្មែរនៅទូទាំងប្រទេសមិនគួរបោះឆ្នោតគាំទ្រគណបក្សប្រជាជនរបស់លោក ហ៊ុន សែន តទៅទៀតទេ ព្រោះលោក ហ៊ុន សែន បានដឹកនាំប្រទេសជាតិមិនត្រឹមត្រូវធ្វើឱ្យប្រជាពលរដ្ឋរងទុក្ខវេទនាគ្មានទីបញ្ចប់។ ជាក់ស្តែងប៉ុន្មានអាណត្តិចុងក្រោយនេះសម្បត្តិធម្មជាតិ រួមមានព្រៃឈើ និងធនធានរ៉ែក្នុងប្រទេសកម្ពុជាត្រូវបំផ្លាញយ៉ាងមហន្តរាយ ហើយជម្លោះដីធ្លីកើតឡើងយ៉ាងពេញបន្ទុកដោយសារតែរដ្ឋាភិបាលលោក ហ៊ុន សែន ប្រគល់ដីសម្បទានសេដ្ឋកិច្ចរាប់លានហិកតាឱ្យក្រុមហ៊ុនក្នុងស្រុក និងក្រុមហ៊ុនបរទេសដោយមិនបានសិក្សាអំពីផលប៉ះពាល់លើជីវភាពរស់នៅរបស់ប្រជាពលរដ្ឋជាមុន។ បញ្ហាជម្លោះដីធ្លីដែលជាវិបត្តិដ៏ធ្ងន់ធ្ងរក្នុងសង្គមជាតិគឺជារឿងមិនអាចបិទបាំងបានឡើយនៅពេលដែលប្រជាពលរដ្ឋរងគ្រោះដោយសារអ្នកមានលុយអ្នកមានអំណាចឆក់ប្លន់ដីធ្លីនាំគ្នាទៅតវ៉ាដល់មុខផ្ទះលោក ហ៊ុន សែន ក្បែរវិមានឯករាជ្យ។ ម្យ៉ាងទៀតការអនុវត្តគោលនយោបាយចាស់សកម្មភាពថ្មីរបស់លោក ហ៊ុន សែន ពុំមានប្រសិទ្ធភាពក្នុងការដោះស្រាយជម្លោះដីធ្លីនោះទេ ព្រោះនៅក្នុងតំបន់ខ្លះក្រោយពេលក្រុមនិស្សិតស្ម័គ្រចិត្តវាស់វែងដីធ្លីផ្តល់សាលាកបត្រដល់ប្រជាពលរដ្ឋរួច បែរជាក្រុមហ៊ុន និងមន្ត្រីអាជ្ញាធរមិនទទួលស្គាល់កម្មសិទ្ធិដីធ្លីរបស់ប្រជាពលរដ្ឋទៅវិញ ធ្វើឱ្យប្រជាពលរដ្ឋនៅតែអស់សង្ឃឹម។

ក្រុមមន្ត្រីអង្គការក្រៅរដ្ឋាភិបាលដែលតាមដានបញ្ហានយោបាយនិងបញ្ហាសង្គមក្នុងប្រទេសកម្ពុជាបានលើកឡើងថាជម្រើសរបស់ប្រជាពលរដ្ឋខ្មែរសម្រាប់ការបោះឆ្នោតថ្ងៃទី២៨ ខែកក្កដាឆាប់ៗខាងមុខនេះ គឺត្រូវបោះឆ្នោតគាំទ្រគណបក្សសង្គ្រោះជាតិដែលមានលោក សម រង្ស៊ី ជាប្រធាន ព្រោះលោក សម រង្ស៊ី ជាមេដឹកនាំល្អគិតគូរផលប្រយោជន៍ជាតិនិងបញ្ហាបូរណភាពទឹកដីជាងគិតគូរប្រយោជន៍ផ្ទាល់ខ្លួន។ លើសនេះទៅទៀតគណបក្សសង្គ្រោះជាតិមានគោលនយោបាយយ៉ាងច្បាស់លាស់ក្នុងការលើកម្ពស់ជីវភាពរស់នៅរបស់មន្ត្រីរាជការ គ្រូបង្រៀន កងកម្លាំងប្រដាប់អាវុធទូទៅ និងកម្មករ-កម្មការិនី ព្រមទាំងប្រជាពលរដ្ឋខ្មែរនៅទូទាំងប្រទេស។ ជាការពិតគណបក្សសង្គ្រោះជាតិមានគោលនយោបាយដំឡើងប្រាក់ខែដល់មន្ត្រីរាជការ កម្លាំងប្រដាប់អាវុធទូទៅឱ្យបាន១លានរៀលក្នុងមួយខែ ដំឡើងប្រាក់ខែដល់កម្មករ-កម្មការិនីឱ្យបានយ៉ាងតិច ១៥០ដុល្លារ ឬ៦០មុឺនរៀលក្នុងមួយខែ ព្រមទាំងផ្តល់ប្រាក់ឧបត្ថម្ភដល់មនុស្សចាស់មានអាយុចាប់ពី៦៥ឆ្នាំឡើងទៅចំនួន៤មុឺនរៀលក្នុងមួយខែ។ ជាពិសេសគណបក្សសង្គ្រោះជាតិគិតគូរអំពីតម្លៃកសិផលរបស់ប្រជាកសិករ និងព្យាបាលជំងឺជូនប្រជាពលរដ្ឋក្រីក្រដោយមិនគិតថ្លៃ៕

អាជ្ញាធរខេត្តមណ្ឌលគិរីមិនយកចិត្តទុកដាក់ជួយដោះស្រាយប្រជាពលរដ្ឋរងគ្រោះដោយសារក្រុមហ៊ុនប្រើអំណាចឆក់ប្លន់ដីធ្លី

មនសិការខ្មែរ — Sun, 19 May 2013 05:22:39 +0000

នៅក្នុងខេត្តមណ្ឌលគិរីបញ្ហាក្រុមហ៊ុនដែលទទួលបានដីសម្បទានសេដ្ឋកិច្ចពីរាជរដ្ឋាភិបាលធ្វើសកម្មភាពឆក់ប្លន់ដីធ្លីប្រជាពលរដ្ឋនៅតែជាវិបត្តិគួរឱ្យព្រួយបារម្ភព្រោះតាំងពីពេលដែលលោក ចាន់ យឿនធ្វើជាអភិបាលខេត្តរហូតមកដល់ពេលនេះមានការផ្លាស់ប្តូរអភិបាលខេត្តថ្មី ក៏រឿងរ៉ាវជម្លោះដីធ្លីបន្តកើតមានយ៉ាងពេញបន្ទុកដដែល។ ជាក់ស្តែងក្រុមហ៊ុនសុវណ្ណរាជសី បានប្រើគ្រឿងចក្រឈូសឆាយរំលោភយកដីពលរដ្ឋចំនួន ៣៧ គ្រួសារតាំងពីខែកុម្ភៈ ឆ្នាំ២០១៣ រហូតមកដល់បច្ចុប្បន្ន មិនទាន់មានដំណោះស្រាយនៅឡើយទេ។ ប្រជាពលរដ្ឋបានសម្តែងនូវភាពអស់សង្ឃឹមព្រោះអាជ្ញាធរឃុំ អាជ្ញាធរស្រុក និងអាជ្ញាធរខេត្តមិនបានយកចិត្តទុកដាក់ជួយរកដំណោះស្រាយដល់ពួកគាត់ឡើយ ផ្ទុយទៅវិញគេបណ្តោយឱ្យក្រុមហ៊ុនសុវណ្ណរាជសី ប្រើគ្រឿងចក្រឈូសឆាយរំលោភយកដីធ្លីរបស់ពួកគាត់យ៉ាងកំរោលដដែល ហើយក្រុមហ៊ុននោះហាក់ដូចជាគ្មានខ្លាចក្រែងច្បាប់ទម្លាប់អ្វីទាំងអស់។

អ្នកភូមិស្រែព្រះ ឃុំស្រែខ្ទុម ស្រុកកែវសីមា ខេត្តមណ្ឌលគិរីបានឱ្យដឹងថា ដីស្រែចំការគឺជាអាយុជីវិតរបស់ពួកគាត់ ក៏ប៉ុន្តែទ្រព្យសម្បត្តិដ៏មានតម្លៃរបស់ពួកគាត់បានបាត់បង់កាលពីខែកុម្ភៈ ឆ្នាំ២០១៣បន្ទាប់ពីដីប្រមាណជាង១០០ហិកតារួមទាំងផលដំណាំលើដីរបស់ពួកគាត់ត្រូវបានក្រុមហ៊ុនសុវណ្ណរាជសីឈូសឆាយចោល ហើយដាំដំឡូងយកជាកម្មសិទ្ធិក្រុមហ៊ុនទៅវិញ។ ប្រជាពលរដ្ឋរងគ្រោះបានចាត់ទុកសកម្មភាពរបស់ក្រុមហ៊ុនសុវណ្ណរាជសីថាជាការរំលោភសិទ្ធិដីធ្លីប្រជាពលរដ្ឋ និងរំលោភទៅលើគោលនយោបាយចាស់សកម្មភាពថ្មីរបស់ប្រមុខរាជរដ្ឋាភិបាល ពោលគឺត្រូវធ្វើប័ណ្ណកម្មសិទ្ធិដីធ្លីជូនប្រជាពលរដ្ឋដែលជាអ្នកកាន់កាប់ជាក់ស្តែងនៅក្នុងបរិវេណដីសម្បទានសេដ្ឋកិច្ច។ ប្រការនេះធ្វើឱ្យប្រជាពលរដ្ឋប្រឈមនឹងការលំបាកយ៉ាងខ្លាំងដោយសារបាត់បង់ដីធ្លីដែលធ្លាប់ប្រកបរបរកសិកម្មចិញ្ចឹមជីវិតជាយូរឆ្នាំមកហើយ ព្រោះពួកគាត់គ្មានរំពឹងអ្វីក្រៅពីមុខរបរកសិកម្មនោះទេ។ ពួកគាត់បានអំពាវនាវឱ្យអាជ្ញាធរគ្រប់លំដាប់ថ្នាក់ព្រមទាំងក្រសួង និងស្ថាប័នពាក់ព័ន្ធជួយរកដំណោះស្រាយបញ្ឈប់សកម្មភាពក្រុមហ៊ុន សុវណ្ណរាជសី កុំឱ្យប្រើគ្រឿងចក្រឈូសឆាយរំលោភយកដីធ្លីពួកគាត់តទៅទៀត។

តំណាងអ្នកភូមិជាច្រើនរូបបានបញ្ជាក់ថាពួកគាត់ព្យាយាមតវ៉ាជាមួយក្រុមហ៊ុនសុវណ្ណរាជសី ព្រមទាំង ធ្វើសេចក្តីរាយការណ៍ទៅអាជ្ញាធរស្រុក អាជ្ញាធរខេត្ត តាំងពីខែមេសា រហូតមក ប៉ុន្តែអ្វីជាលទ្ធផលនៃការតវ៉ារបស់ពួកគាត់គឺភាពអស់សង្ឃឹមព្រោះមិនឃើញមានដំណោះស្រាយអ្វីដែលមន្ត្រីអាជ្ញាធរជួយដល់ពួកគាត់ទាល់តែសោះ។ បញ្ហានេះធ្វើឱ្យពួកគាត់អស់ការអត់ធ្មត់ក្នុងការរង់ចាំឱ្យអាជ្ញាធរស្រុក និងអាជ្ញាធរខេត្តជួយរកដំណោះស្រាយ ហើយជម្រើសចុងក្រោយនៃការសម្រេចចិត្តរបស់អ្នកភូមិ គឺត្រូវធ្វើញត្តិដាក់ជូនលោកនាយករដ្ឋមន្ត្រី ហ៊ុន សែន ឱ្យជួយរកដំណោះស្រាយ។ ដោយហេតុថាពួកគាត់តវ៉ាតាំងពីខែកុម្ភៈ រហូតដល់ខែឧសភា នៅតែគ្មានដំណោះស្រាយឥឡូវនេះដល់រដូវភ្លៀងធ្លាក់ពួកគាត់ត្រូវការដាំដុះ ប៉ុន្តែមន្ត្រី អាជ្ញាធរស្រុក និងអាជ្ញាធរខេត្តព្រងើយកន្តើយមិនអើពើចំពោះទុកលំបាករបស់ពួកគាត់ឡើយ។ ប្រជាពលរដ្ឋរងគ្រោះបានជំរុញឱ្យមានការដាក់ទោសក្រុមហ៊ុនដែលប្រើអំណាចរំលោភយកដីធ្លីរបស់ពួកគាត់ផងដែរ ដើម្បីជាការព្រមានកុំឱ្យក្រុមហ៊ុនដទៃទៀតយកគំរូតាមក្រុមហ៊ុននេះក្នុងការធ្វើបាបអ្នកទន់ខ្សោយ។

សូមបញ្ជាក់ថាកាលពីខែមេសា ឆ្នាំ២០១៣ តំណាងប្រជាពលរដ្ឋរងគ្រោះបាននាំយកពាក្យបណ្តឹងមានស្នាមមេដៃ ៣៧គ្រួសារដាក់ជូនអាជ្ញាធរស្រុក និងអាជ្ញាធរខេត្ត មន្ទីររៀបចំដែនដី និងសមាគមការពារសិទ្ធិមនុស្សអាដហុក សុំឱ្យជួយអន្តរាគមន៍រកយុត្តិធម៌។ ប៉ុន្តែការសន្យារបស់មន្ត្រីអាជ្ញាធរមូលដ្ឋានថាជួយដោះស្រាយជូនប្រជាពលរដ្ឋ គឺជាការសន្យាខ្យល់ ពោលគឺជាការសន្យាមិនមានការទទួលខុសត្រូវ ឥឡូវនេះប្រជាពលរដ្ឋអស់ជំនឿលើមន្ត្រីអាជ្ញាធរមូលដ្ឋាន ទើបនាំគ្នារកអន្តរាគមន៍ពីអាជ្ញាធរថ្នាក់ជាតិវិញ។ ប្រជាពលរដ្ឋបានត្អួញត្អែរថាក្រុមហ៊ុនសុវណ្ណរាជសី មិនអនុវត្តន៍តាមបទបញ្ជារបស់រាជរដ្ឋាភិបាលទេ ហើយចាប់ពីខែកុម្ភៈ រហូតមកក្រុមហ៊ុនបានប្រើគ្រឿងចក្រឈូសឆាយចំការដំឡូង និងផ្ទះសម្បែងរបស់ពលរដ្ឋតាមអំពើចិត្ត។ តាមសេចក្តីរាយការណ៍របស់ប្រជាពលរដ្ឋរងគ្រោះបានឱ្យដឹងថាពួកគាត់ ៣៧គ្រួសារមានដំណាំកៅស៊ូ និងដំឡូងប្រមាណ ៦០ហិកតា និងដីទំនេរប្រមាណ៤០ហិកតា ត្រូវក្រុមហ៊ុនសុវណ្ណរាជសីឈូសឆាយតាំងពីខែកុម្ភៈ។

ទាក់ទងនឹងបញ្ហាខាងលើនេះមន្ត្រីអង្គការក្រៅរដ្ឋាភិបាលក្នុងខេត្តរតនគិរីបានរកឃើញថាប្រជាពលរដ្ឋ៣៧គ្រួសារបានចូលទៅរស់នៅនិងកាន់កាប់ដីតំបន់នោះមុនបទបញ្ជា០១ ឬគោលនយោបាយចាស់សកម្មភាពថ្មីរបស់រដ្ឋាភិបាល ហើយតាមស្ថិតិដែលអ្នកភូមិបានរាយការណ៍គឺអ្នកភូមិបានដាំដំឡូងមី និងកៅស៊ូសរុប ១២៤ហិកតារួចហើយ។ ក្រុមមន្ត្រីសិទ្ធិមនុស្សបានអះអាងថាក្រុមអាជ្ញាធរពាក់ព័ន្ធគួរធ្វើការត្រួតពិនិត្យ និងស៊ើបអង្កេតឱ្យឃើញថាក្រុមហ៊ុនពិតជាបានរំលោភឈូសឆាយដំណាំប្រជាពលរដ្ឋពិតមែនឬក៏អត់។ ម្យ៉ាង ទៀត ប្រសិនបើអ្នកភូមិពិតជាបានដាំដុះរួចមែន ទោះបីក្រោយបទបញ្ជាលេខ០១ក្តី ក៏ក្រុមហ៊ុនពុំមានសិទ្ធិឈូសឆាយដំណាំរបស់អ្នកភូមិចោលដែរ ព្រោះសកម្មភាពរបស់ក្រុមហ៊ុនជាអំពើខុសច្បាប់។ លើសនេះទៅទៀតប្រជាពលរដ្ឋបានប្តឹងទៅអាជ្ញាធរស្រុក និងអាជ្ញាធរខេត្តតាំងពីខែកុម្ភៈរហូតមកដល់ពេលនេះនៅតែពុំមានដំណោះស្រាយដែលជាសក្ខីភាពបង្ហាញថាអាជ្ញាធរ ស្រុកកែវសីមា និងអាជ្ញាធរខេត្តមណ្ឌលគិរី មិនបានយកចិត្តទុកដាក់ដោះស្រាយជូនប្រជាពលរដ្ឋឱ្យបានទាន់ពេលវេលាទេ។

តាមរបាយការណ៍របស់ក្រុមមន្ត្រីអង្គការសិទ្ធិមនុស្សខេត្តមណ្ឌលគិរីបានឱ្យដឹងថាកាលពីឆ្នាំ២០១១ក្រុមហ៊ុនសុវណ្ណរាជសី ទទួលបានដីសម្បទានសេដ្ឋកិច្ចទំហំជាង៦ពាន់ហិកតា នៅព្រំប្រទល់ខេត្តចំនួន ២គឺឃុំខ្សឹម ស្រុកស្នួល ខេត្តក្រចេះជាង៤ពាន់ហិកតា និងនៅឃុំស្រែខ្ទុម ស្រុកកែវសីមា ខេត្តមណ្ឌលគិរីជាង២ពាន់ហិកតា។ ចំពោះអំពើរំលោភយកដីធ្លីពីសំណាក់ក្រុមហ៊ុនសុវណ្ណរាជសី ត្រូវបានប្រជាពលរដ្ឋរងគ្រោះទាំង ៣៧ គ្រួសារត្រៀមឯកសាររួច រាល់ហើយដើម្បីដាក់ជូនខុទ្ទកាល័យលោកនាយករដ្ឋមន្ត្រី ហ៊ុន សែន នាពេលឆាប់ៗ។ តាមការគ្រោងទុកតំណាងអ្នកភូមិស្រែព្រះឃុំស្រែខ្ទុម ស្រុកកែវសីមា ខេត្តមណ្ឌលគិរី នឹងធ្វើដំណើរមករាជធានីភ្នំពេញ នៅថ្ងៃទី១៩ ខែឧសភា ដើម្បីប្រគល់ញត្តិសុំអន្តរាគមន៍ពីលោកនាយករដ្ឋមន្ត្រី ហ៊ុន សែន ឱ្យជួយរកយុត្តិធម៌។ ជុំវិញបញ្ហានេះក្រុមមន្ត្រីអង្គការសិទ្ធិមនុស្សមួយចំនួនពុំមានរំពឹងថាលោក ហ៊ុន សែន អាចគិតគូរជួយដោះស្រាយដល់ប្រជាពលរដ្ឋរងគ្រោះនោះទេ ហើយអ្វី ដែលគួរឱ្យព្រួយបារម្ភខ្លាចក្រែងតែសមត្ថកិច្ចអាជ្ញាធររាជធានីភ្នំពេញប្រើអំពើហិង្សាបង្ក្រាបប្រជាពលរដ្ឋអ្នកតវ៉ាយ៉ាងសាហាវព្រៃផ្សៃនៅក្បែរផ្ទះលោកនាយករដ្ឋមន្ត្រីដូចក្រុមអ្នកតវ៉ារឿងជម្លោះដីធ្លីមុនៗទៀត៕

លោក ឯក សឿន និងលោក គឹម ពិសី រកចំណូលឲ្យថ្នាក់លើទំនងជាមិនជួបវាសនាអាក្រក់នោះទេ

មនសិការខ្មែរ — Sun, 19 May 2013 05:18:28 +0000

ច្រើនឆ្នាំមកហើយដែលក្រុមអ្នករកស៊ីដឹកជញ្ជូនទំនិញទាំងតូចទាំងធំទាំងស្របច្បាប់និងខុសច្បាប់ តាមផ្លូវជាតិលេខ៦៨ បានរអ៊ូរទាំពី ភាពអនាធិបតេយ្យរបស់មន្ត្រីនគរ បាលសេដ្ឋកិច្ចចំនួន២រូប គឺលោក គឹម ពិសី និងលោក ឯក សឿនដែល ជាជើងខ្លាំងពូកែប្រដេញរថយន្តដឹក ទំនិញគ្រប់ប្រភេទឲ្យចូលបង់លុយ ហើយភាពអនាធិបតេយ្យរបស់លោក ឯក សឿននិងលោក កឹម ពិសី ផ្ទុយពី បទបញ្ជារបស់អគ្គស្នងការនគរបាល ជាតិច្រើនឆ្នាំមកហើយ មិនដែលមានការដាក់ពិន័យម្តងណាឡើយ។ កាលពីដើមខែឧសភា កន្លងទៅនេះ លោក ឯក សឿននិងលោកគឹម ពិសី មានជាប់ពាក់ព័ន្ធជាមួយករណីចាប់រថយន្តដឹកឈើគ្រញូង ហើយឃុបឃិតដោះលែងទៅវិញស្ងាត់ៗដោយមិនបានសុំយោបល់ពីព្រះរាជអាជ្ញាអាចចាត់ទុកជាកំហុសឆ្គងដ៏ធំមួយដែលថ្នាក់លើបានព្រមានដាក់ពិន័យ និងបណ្តេញចេញពីក្របខ័ណ្ឌ។

ប្រជាពលរដ្ឋបានលើកឡើងថាលោក គឹម ពិសី និងលោក ឯក សឿន គឺជាមន្ត្រីដែលសកម្មក្នុងការប្រមូលលុយតាមគ្រប់រូបភាពយកទៅជូនថ្នាក់លើ ឲ្យបានទាន់ពេលវេលានិងគ្រប់ចំនួន ព្រោះការដេញ ថ្លៃប៉ុស្តិ៍ដើម្បីបានទៅឈរជើងនៅតាមផ្លូវជាតិលេខ៦៨ ពីទីរួមខេត្ត ឧត្តរមានជ័យ រហូតដល់ស្រុកក្រ ឡាញ់ ខេត្តសៀមរាប ក៏ចំណាយប្រាក់ច្រើនសន្ធឹកសន្ធាប់ក្នុងមួយខែៗ បើមិនព្យាយាមរកប្រាក់បង់ជូនថ្នាក់លើឲ្យគ្រប់ចំនួននិងទាន់ ពេលវេលាទេនោះ គឺមិនអាចឈរជើងនៅផ្លូវជាតិលេខ៦៨បានទៀតទេ។ ច្បាស់ណាស់ដែលថាមន្ត្រីនគរ បាលសេដ្ឋកិច្ចក្រសួង មហាផ្ទៃមួយចំនួន បានប្រើប្រាស់តួនាទីរបស់ខ្លួនទៅស្វែងរកលាភសក្ការៈ យកទៅច្រកហោប៉ៅផ្ទាល់ខ្លួននិងយកទៅបង់ជូនថ្នាក់លើជាទៀងទាត់ ដើម្បីរក្សាប៉ុស្តិ៍របស់ពួកគេ ហើយជាធម្មតា ក្រុមឈ្មួញរកស៊ីដឹកជញ្ជូនទំនិញគេចពន្ធឬការដឹកជញ្ជូនឈើខុសច្បាប់សុទ្ធតែជាប់កាតព្វកិច្ចចូល បង់លុយឲ្យសមត្ថកិច្ចដែលប្រចាំការតាមដងផ្លូវ ទើបពួកគេអាចចៀសផុតពីការបង្ក្រាប។

ផ្លូវជាតិលេខ៦៨ គឺជាចំណុចឆ្លងកាត់ដ៏សំខាន់ ដែលក្រុមឈ្មួញប្រើប្រាស់ក្នុងការដឹកជញ្ជូនប្រេងសាំងគេចពន្ធ ក្នុងមួយថ្ងៃៗរាប់សិបតោនគឺគេដឹកជញ្ជូនទាំងតាមរថយន្ត ស៊ីទែន និងតាមរថយន្តកូរ៉េ នីសាន់ ដែលក្នុងមួយគ្រឿងៗផ្ទុកប្រេងសាំងគេចពន្ធរាប់សិបកាន ហើយប្រេងសាំងទាំងនោះត្រូវបានក្រុម ឈ្មួញលួចនាំចូលតាមច្រកអូរស្មាច់ ឬតាមច្រករបៀងនានាតាមខេត្តឧត្តរមានជ័យ បន្តដឹកជញ្ជូនមកលក់ចែកចាយក្នុងខេត្តសៀមរាប យ៉ាងអនា ធិបតេយ្យបំផុត។ មេឈ្មួញរកស៊ីដឹកជញ្ជូនប្រេងគេចពន្ធតាមផ្លូវជាតិលេខ៦៨ស្គាល់ចិត្តស្គាល់ថ្លើមលោក ឯក សឿននិងលោក គឹម ពិសី ច្បាស់ ណាស់ តាមរយៈការបង់លុយជាប្រចាំជើង ឬប្រចាំខែ ទើបអាចរកស៊ីដឹកជញ្ជូនប្រេងសាំងគេចពន្ធដោយគ្មានការរំខាន ហើយគ្រាន់តែប្រាក់ ចំណូលដែលបានមកពីក្រុមឈ្មួញរកស៊ីដឹកជញ្ជូនប្រេងសាំងគេចពន្ធក្នុងមួយខែៗអាចប្រមូលយកទៅបង់ថ្លៃប៉ុស្តិ៍យ៉ាងងាយស្រួលបំផុត។

ដោយឡែក ផ្លូវជាតិលេខ៦៨នេះដែរ គឺជាចំណុចដែលក្រុមឈ្មួញរកស៊ីដឹកជញ្ជូនឈើខុសច្បាប់យ៉ាងគគ្រឹកគគ្រេង ទាំងតាមរថយន្តតូច និងរថយន្តធំ ហើយការដឹកជញ្ជូនឈើខុសច្បាប់ភាគច្រើន បានរាយការណ៍ជូនសមត្ថកិច្ចនិងមន្ត្រីជំនាញដែលប្រចាំការតាមដងផ្លូវជាមុន គឺមានករណីតិចតួចប៉ុណ្ណោះ ដែលការដឹកជញ្ជូនឈើធ្វើតាមរបៀបលោតឆ័ត្រ។ លោក គឹម ពិសី និងលោក ឯក សឿន មានទំនាក់ទំនងល្អជាមួយជំនាញរដ្ឋបាលព្រៃឈើ ហើយធ្លាប់សហការគ្នាប្រដេញឡានដឹកឈើលោតឆ័ត្រដែលមិនបានចូល បង់លុយឲ្យពួកគេ មិនដែលខ្វល់ខ្វាយពីគ្រោះថ្នាក់ ឬផលប៉ះពាល់ចំ ពោះអ្នកដំណើរនៅតាមដងផ្លូវនោះទេ ធ្វើយ៉ាងណាឲ្យតែពួកគេអាចប្រដេញឡានដឹកឈើទាំងនោះឲ្យចូលបង់លុយតាមការទាមទារ ដែលពួកគេធ្លាប់បានធ្វើជោគជ័យច្រើនឆ្នាំមកហើយ មិនដែលភ្លាត់ស្នៀតទេ។

ជាក់ស្តែង កាលពីថ្ងៃទី៥ ខែឧសភា ឆ្នាំ២០១៣ លោក គឹម ពិសី ដោយមានការឆ្លងយោបល់ពីលោក ឯក សឿន បាននាំគ្នាប្រដេញចាប់រថយន្តដឹកឈើគ្រញូងម៉ាកកាមរី ពណ៌ស ឆ្នាំ១៩៩៣ មួយគ្រឿងដែលក្នុងនោះមានផ្ទុកឈើគ្រញូងប្រមាណ៥០០គីឡូក្រាម ខណៈដែលរថយន្តដឹកឈើគ្រញូងបានធ្វើដំណើរចេញពីក្រុងសំរោង ខេត្តឧត្តរមានជ័យ មកតាមផ្លូវជាតិលេខ៦៨ ឆ្ពោះមកកាន់ស្រុកក្រឡាញ់ ខេត្តសៀមរាប ហើយពេលរថយន្តនោះបើកបរដល់ចំណុចស្រុកស្រីស្នំ លោក គឹម ពិសី ដែលបានសហការ ជាមួយជំនាញរដ្ឋបាលព្រៃឈើ ក៏ស្ទាក់ចាប់រថយន្តដឹកឈើនោះបានសម្រេច។ ក្រោយមកមានការចរចាគ្នាបង់លុយចំនួន២៥០០ដុល្លារអា មេរិក ទើបមានការដោះលែងទាំងរថយន្តដឹកឈើនិងឈ្មួញដោយមិនសុំយោបល់ពីព្រះរាជអាជ្ញានោះឡើយ ហើយបើផ្អែកតាមគោលការណ៍មុនពេលប្រដេញចាប់ឡានដឹកឈើ ឬសម្រេចដោះលែងយ៉ាងណានោះក្នុង នាមជាមន្ត្រីនគរបាលយុត្តិធម៌មិន អាចធ្វើអ្វីៗតាមអំពើចិត្តរបស់ខ្លួនបានទេ គឺត្រូវតែសុំយោបល់និងការ ឯកភាពពីស្ថាប័នតុលាការ។

ផ្អែកតាមសកម្មភាពដែលលោក គឹម ពិសី និងលោក ឯក សឿន ដែលបានប្រព្រឹត្តផ្ទុយពីបទបញ្ជារបស់អគ្គស្នងការនគរជាតិ ជាពិសេសបទបញ្ជាណែនាំរបស់លោកនាយករដ្ឋមន្ត្រី ហ៊ុន សែន ដោយពួកគេបានប្រែក្លាយខ្លួនពីមន្ត្រីនគរបាលសេដ្ឋកិច្ចដែលមានតួនាទីបង្ក្រាបបទល្មើស បែរជានាំគ្នាប្រព្រឹត្តអំពើខុសច្បាប់ដែលមានចែងនិងផ្តន្ទាទោសក្នុងក្រម ព្រហ្មទណ្ឌអាចចាត់ទុកជាកំហុសឆ្គងធ្ងន់ធ្ងរបំផុត ដែលប្រឈមនឹងការបណ្តេញចេញពីមុខតំណែងឬពី ក្របខ័ណ្ឌនគរបាលជាតិ។ ប៉ុន្តែករ ណីនេះគេគួរតែធ្វើការស៊ើបអង្កេតឲ្យ បានស៊ីជម្រៅថាតើលោក គឹម ពិសី និងលោកឯក សឿន ដែលបានចេញ ធ្វើសកម្មភាពកាប់ដាវប្រមូលលុយយកទៅជូនថ្នាក់លើឲ្យបានគ្រប់ចំ នួន និងទាន់ពេលវេលាច្រើនឆ្នាំមកហើយនោះគួរត្រូវបានបណ្តេញចេញ ពីក្របខ័ណ្ឌនគរបាលជាតិឬក៏យ៉ាង ណា? ព្រោះកន្លងមក គេមិនសូវឃើញមន្ត្រីនគរបាលសេដ្ឋកិច្ចក្រសួង មហាផ្ទៃដែលប្រព្រឹត្តខុស ត្រូវបានបកស័ក្តិឬត្រូវបណ្តេញចេញពីក្រប ខ័ណ្ឌនោះទេ ដែលករណីខ្លះគ្រាន់តែមានការដកបញ្ឈរជើងបណ្តោះអាសន្នមួយរយៈប៉ុណ្ណោះ គឺអាចសម្របសម្រួលទៅកាន់តំណែងនៅកន្លែងដើមវិញ ហើយសម្រាប់លោក ឯក សឿន និងលោក គឹម ពិសី ដែលពូកែរកលុយជូនថ្នាក់លើច្បាស់ណាស់ដែលថា មិនអាចជួបវាសនាអាក្រក់ណាមួយនោះទេ៕

អ៊ីវ ឯកសាវត្តី សម្ងំប្រមូលលាភសក្ការៈពីការដឹកជញ្ជូនឈើខុសច្បាប់ទាំងតាមផ្លូវទឹកនិងតាមផ្លូវគោកក្នុងខេត្តស្ទឹងត្រែង

មនសិការខ្មែរ — Sun, 19 May 2013 04:52:24 +0000

ក្នុងតួនាទីជានាយខណ្ឌរដ្ឋបាល ព្រៃឈើខេត្តស្ទឹងត្រែង លោក អ៊ី ឯកសាវត្តី បានធ្វើមិនដឹងមិនឮចំពោះសកម្មភាពដឹកជញ្ជូនឈើខុសច្បាប់របស់ក្រុមឈ្មួញទាំងតូចទាំងធំនៅទូទាំងខេត្តស្ទឹងត្រែង ហើយកាលពីប៉ុន្មានថ្ងៃមុននេះ មានទូកដឹក ជញ្ជូនឈើប្រណីតចំនួន២គ្រឿង បានចូលចតលើកឈើទៅដាក់នៅក្នុងឃ្លាំងដ៏ធំមួយកណ្តាលក្រុងស្ទឹងត្រែង ដោយគ្មានការរំខាន ហើយប្រសិនបើគ្មានការបើកភ្លើងខៀវពីមន្ត្រីជំនាញ និងសមត្ថកិច្ចពាក់ព័ន្ធទេនោះ គេយល់ថាក្រុមឈ្មួញមិនអាចដឹកជញ្ជូនឈើយ៉ាងអនាធិបតេយ្យឆ្លងកាត់ខេត្តស្ទឹងត្រែងបានទេហើយមកដល់ពេលនេះ ការដឹកជញ្ជូនឈើខុសច្បាប់ទ្រង់ទ្រាយធំនៅ តែបន្តកើតមានយ៉ាងគគ្រឹកគគ្រេងក្នុងទឹកដីខេត្តស្ទឹងត្រែង។

សកម្មភាពរបស់ក្រុមឈ្មួញទាំងតូចទាំងធំដែលកំពុងរកស៊ីដឹកជញ្ជូន ឈើយ៉ាងអនាធិបតេយ្យក្នុងខេត្តស្ទឹងត្រែង ហាក់ដូចជាមិនក្រែងញ ញើតចំពោះបទបញ្ជាលេខ០១ របស់រដ្ឋាភិបាលសូម្បីតែបន្តិចហើយលោក អីុវ ឯកសាវត្តី ជានាយខណ្ឌរដ្ឋបាលព្រៃឈើខេត្តស្ទឹងត្រែង ក៏មិនដែលអើពើបង្ការបង្ក្រាបនិងទប់ស្កាត់ការរកស៊ីដឹកជញ្ជូនឈើខុសច្បាប់របស់ក្រុមឈ្មួញម្តងណាឡើយ ដែលគេសង្ស័យថា លោក អីុវ ឯកសាវត្តី ទទួលបានប្រយោជន៍ច្រើនសន្ធឹកសន្ធាប់ពីការដឹកជញ្ជូនឈើខុសច្បាប់ ទាំងនោះផងដែរ។ ក្រុមឈ្មួញនៅក្នុងខេត្តស្ទឹងត្រែងភាគច្រើនរកស៊ីដឹកជញ្ជូនឈើឡើងដុះស្លែទៅហើយនិងមានទំនាក់ទំនងយ៉ាងស៊ីជម្រៅជាមួយជំនាញរដ្ឋបាលព្រៃឈើនិងសមត្ថកិច្ចពាក់ព័ន្ធទាំងអស់ ទើបអ្វីៗចេះតែរលូនល្អមិនដែលមានឧបសគ្គ ហើយរឿងសំខាន់បំផុតនោះគឺការផ្តល់ផលប្រយោជន៍ឲ្យមន្ត្រីជំនាញនិងសមត្ថកិច្ចពាក់ព័ន្ធដើម្បីឲ្យជួយចេញមុខរត់ការសម្រាប់ការដឹកជញ្ជូន ឈើខុសច្បាប់យ៉ាងពេញបន្ទុក។

ក្រុមឈ្មួញដែលចេញមុខចេញមាត់ខ្លាំងជាងគេ និងឈរជើងយ៉ាងរឹងមាំក្នុងខេត្តស្ទឹងត្រែង គឺអ្នកស្រី ហេង សំនៀង ហៅយាយព្រឿង ដែលជាមេឈ្មួញជនជាតិយួន រកស៊ីដឹកជញ្ជូនឈើសឹងផ្តាច់មុខទៅហើយក្នុងអាណាចក្រខេត្តស្ទឹងត្រែង ទាំងតាមផ្លូវទឹក និងតាមផ្លូវគោក ហើយយាយព្រឿងក៏មានទីតាំងស្តុកឈើដ៏ធំមួយកន្លែង នៅចំណុចភូមិបាចុង សង្កាត់ព្រះបាត ក្រុងស្ទឹង ត្រែង ជាប់ដងទន្លេមេគង្គ ក្បែរភូមិគ្រឹះដ៏ធំស្កឹមស្កៃរបស់គាត់។ យាយព្រឿងបានប្រមូលទិញឈើមកពីចំណុចស្រុកសៀមប៉ាង និងស្រុកសេសាន ហើយដឹកជញ្ជូនតាមទូកចុះមកក្រុងស្ទឹងត្រែងតាមបណ្តោយដងទន្លេមេគង្គមិនដែលជួបឧបសគ្គអ្វីឡើយ ហើយពេលសមត្ថកិច្ចឬអ្នកសារព័ត៌មានសួរនាំពីការដឹកជញ្ជូនឈើគេតែងតែឮយាយព្រឿងអះអាងថាបើចង់ដឹងរឿងច្បាស់សូមសួរនាំលោក សួង ម៉េងលី ជាមន្ត្រីរដ្ឋបាលព្រៃឈើខេត្តស្ទឹងត្រែង និងជាមនុស្ស ជំនិតរបស់លោក អីុវ ឯកសាវត្តី។

គេមិនច្បាស់ទេថា តើយាយព្រឿង មានទំនាក់ទំនងពិសេសជាមួយលោក អីុវ ឯកសាវត្តី ក្នុងកម្រិតណានោះទេ ប៉ុន្តែគេដឹងថា នៅពេលដឹកជញ្ជូនឈើម្តងៗយាយព្រឿងបានពឹងអាស្រ័យឲ្យលោក សួង ម៉េងលី ជួយរត់ការឬអាចនិយាយបានថា លោក សួង ម៉េងលី ជាអ្នកប្រមូលផលប្រយោជន៍ពីការដឹកជញ្ជូនឈើខុសច្បាប់របស់យាយព្រឿង និងឈ្មួញដទៃទៀតយកទៅជូនលោក អីុវ ឯកសាវត្តី ដើម្បីចៀសផុតពីការបង្ក្រាប។ ពេលខ្លះសមត្ថកិច្ចមួយចំនួនបានសម្តែងការមិនពេញចិត្តចំពោះមន្ត្រីជំនាញរដ្ឋបាលព្រៃឈើខេត្តស្ទឹងត្រែង ដែលបានឃុបឃិតឬសម្របសម្រួលឲ្យក្រុមឈ្មួញរកស៊ីដឹកជញ្ជូនឈើខុសច្បាប់យ៉ាងអនាធិបតេយ្យ ហើយគ្រប់ពេលទាំងអស់ដែលយាយព្រឿងដឹកជញ្ជូនឈើ មន្ត្រីជំនាញបានចេញមុខមកអះអាង ថាជាឈើស្របច្បាប់មានលិខិតស្នាម សម្រាប់ការដឹកជញ្ជូនឈើត្រឹមត្រូវ ប៉ុន្តែរឿងពិតមន្ត្រីជំនាញរដ្ឋបាលព្រៃឈើ ព្រោះតែទទួលបានប្រយោជន៍យ៉ាងច្រើនក្រាស់ក្រែលពីយាយព្រឿង ចេះតែជួយសម្របសម្រួលកាងការដឹកជញ្ជូនឈើរបស់យាយព្រឿងជាប់ជាប្រចាំទៅហើយ។

ជាគោលការណ៍របស់រាជរដ្ឋាភិបាល បានហាមឃាត់មិនឲ្យមានការកាប់បំផ្លាញព្រៃឈើឬការដឹកជញ្ជូនឈើខុសច្បាប់នោះទេ ដូច្នេះការរកស៊ីដឹកជញ្ជូនឈើប្រណីត ប្រភេទធ្នង់ បេង នាងនួន ហើយពេលខ្លះទៀតមានឈើគ្រញូងរបស់យាយព្រឿង ដែលមន្ត្រីជំនាញរដ្ឋបាលព្រៃឈើអះអាងថាជាឈើស្របច្បាប់មាន លិខិតស្នាមត្រឹមត្រូវនោះមិនដឹងជាយាយព្រឿងចំណាយប្រាក់ប៉ុន្មានបង់ ជូនជំនាញរដ្ឋបាលព្រៃឈើ ដើម្បីទទួលបានភាពស្របច្បាប់សម្រាប់ការដឹកជញ្ជូនឈើនោះទេ។ យ៉ាងណាក៏ដោយ ការប្រមូលទិញឈើពីចំណុចស្រុកសេសាននិងស្រុកសៀម ប៉ាងរបស់យាយព្រឿងនាពេលបច្ចុប្បន្ននេះ គឺជាប្រភពបង្កើតឲ្យមានភាពអនាធិបតេយ្យនៃការកាប់បំផ្លាញព្រៃឈើយ៉ាងរាលដាលបំផុត ដែលទាមទារឲ្យរដ្ឋមន្ត្រីក្រសួងកសិកម្មលោក ច័ន្ទ សារុន ត្រួតពិនិត្យមើលភាពអសកម្មនិងអំពើពុករលួយ របស់ អីុវ ឯកសាវត្តី ឡើងវិញផង។

ដោយឡែក មានឈ្មួញ២នាក់ ទៀត ដែលសកម្មក្នុងការរកស៊ីដឹកជញ្ជូនឈើខុសច្បាប់ដ៏ល្បីឈ្មោះក្នុងខេត្តស្ទឹងត្រែង មានដូចជាមេឈ្មួញ អ៊ូ ខុង ដែលរកស៊ីដឹកជញ្ជូនឈើប្រណីត ឬឈើគ្រញូងតាមរថយន្តទំនើបៗមកពីខេត្តស្ទឹងត្រែងឆ្លងកាត់ខេត្តក្រចេះតាមផ្លូវជាតិលេខ៧ ដើម្បីបន្តនាំចេញទៅលក់នៅស្រុកយួនយ៉ាងអនាធិបតេយ្យគ្មាននរណាហ៊ានប៉ះពាល់ទេ ព្រោះមេឈ្មួញ អ៊ូ ខុងមានទំនាក់ទំនងល្អជាមួយជំនាញ រដ្ឋបាលព្រៃឈើទាំងក្នុងខេត្តស្ទឹងត្រែងនិងខេត្តក្រចេះ។ ដោយឡែក មេឈ្មួញម្នាក់ទៀត គឺលោក ធី បាញ់ បានប្រើប្រាស់ស្បែកជាយោធា ធ្វើសកម្មភាពរកស៊ីដឹកជញ្ជូនឈើគ្រញូង មកពីស្រុកសៀមប៉ាង និងស្រុកសេ សាន តាមផ្លូវជាតិលេខ៧ ឆ្លងកាត់ខេត្តក្រចេះដើម្បីនាំចេញទៅស្រុកយួនតាមស្រុកស្នួលផងដែរ គឺលោក ធី បាញ់ កំពុងធ្វើសកម្មភាពរកស៊ីឈើខុសច្បាប់ ដើម្បីប្រមូលលុយយកទៅជួយទ្រទ្រង់ឆ្នាំងបាយរបស់លោក ផ្កាយ៣ម្នាក់ យ៉ាងរលូនល្អហើយសមត្ថកិច្ចជាច្រើនចេះតែយោគ យល់ចំពោះការរកស៊ីឈើខុសច្បាប់របស់លោក ធី បាញ់ ដោយសារមូលហេតុ២យ៉ាង គឺទី១លោក ធី បាញ់ ជាមនុស្សសាហាវ ធ្លាប់បាញ់មនុស្សមិនញញើតដៃ និងទី២ គឺលោក ធី បាញ់ ធ្លាប់បានផ្តល់ផលប្រយោជន៍យ៉ាងច្រើនឲ្យមន្ត្រីជំនាញរដ្ឋបាលព្រៃជាប់ជាប្រចាំផងដែរ៕

មហាបាតុកម្មទាមទារឲ្យកែទម្រង់ប្រព័ន្ធបោះឆ្នោតរបស់គណបក្សសង្គ្រោះជាតិជាបេសកកម្មធំបំផុតជួយឲ្យរា្រស្តខ្មែរមានសិទ្ធិសម្រេចអនាគតខ្លួនឯង

មនសិការខ្មែរ — Sun, 19 May 2013 04:49:45 +0000

តាមការគ្រោងទុកលោក សុរិយា ស៊ូប៊ែរឌី អ្នករាយការណ៍ពិសេសអង្គការសហប្រជាជាតិទទួលបន្ទុកផ្នែកសិទ្ធិមនុស្សនៅកម្ពុជា ត្រូវមកបំពេញបេសកកម្មលើកទី ៩ នៅកម្ពុជា ចាប់ពីថ្ងៃទី១៩ ដល់ថ្ងៃទី២៩ ខែឧសភា ឆ្នាំ២០១៣ ដែលបេសកកម្មនេះផ្តោតលើការតាមដានអនុសាសន៍ ដែលលោកបានលើកឡើងក្នុងរបាយការណ៍ដាក់ជូនរាជរដ្ឋាភិបាលកម្ពុជា អំពីការកែទម្រង់ប្រព័ន្ធបោះឆ្នោត ហើយបេសកកម្មលើកនេះ ក៏មានគម្រោងពិភាក្សាជាមួយអង្គការសង្គមស៊ីវិល តំណាងគណបក្សនយោបាយ និងមន្ត្រីរដ្ឋាភិបាលផងដែរ ប៉ុន្តែមិនទាន់កម្មវិធីជាក់លាក់ណាមួយ ត្រូវបានបង្ហាញឲ្យដឹងនៅឡើយទេ។ ទោះជាយ៉ាងណាបេសកកម្មលើកទី ៩ របស់លោក សុរិយា ស៊ូប៊ែរឌី មានតម្លៃខ្លាំងណាស់ នៅពេលដែលគណបក្សសង្គ្រោះជាតិបានរៀបចំគម្រោងធ្វើមហាបាតុកម្មទ្រង់ទ្រាយធំ ដើម្បីបង្ហាញគោលជំហរគាំទ្រចំពោះអនុសាសន៍របស់អង្គការសហប្រជាជាតិ និងនាំយកញ្ញត្តិទៅដាក់ជូនការិយាល័យឧត្តមស្នងការសហប្រជាជាតិ និងដាក់ជូនការិយាល័យតំណាងសហគមន៍អឺរ៉ុបផងដែរ។

សហគមន៍អន្តរជាតិ រួមទាំងមេដឹកនាំពិភពលោកសំខាន់ៗមួយចំនួនបានយកអនុសាសន៍របស់លោក សុរិយា ស៊ូប៊ែរឌី មកធ្វើជាមូលដ្ឋានដើម្បីទាមទារឲ្យអ្នកកាន់អំណាចនៅស្រុកខ្មែរធ្វើការកែទម្រង់ប្រព័ន្ធបោះឆ្នោត ធ្វើវិសោធនកម្មច្បាប់ និងកែប្រែរបៀបរបបការងារមួយចំនួន ដែលក្នុងនោះមានរាប់បញ្ចូលទាំងការផ្លាស់ប្តូរសមាសភាព គ.ជ.ប ដើម្បីធានាភាពឯករាជ្យ អព្យាក្រឹត ក្នុងការរៀបចំបោះឆ្នោតឲ្យមានភាពសេរីត្រឹមត្រូវ យុត្តិធម៌ ស្របតាមគោលការណ៍នៃលទ្ធិប្រជាធិបតេយ្យផងដែរ។ អនុសាសន៍របស់លោក សុរិយា ស៊ូប៊ែរឌី ដែលបានដាក់ជូនកិច្ចប្រជុំពេញអង្គនៃក្រុមប្រឹក្សាសិទ្ធិមនុស្ស អង្គការសហប្រជាជាតិ នាទីក្រុងហ្សឺណែវ កាលពីឆ្នាំមុន បានលើកឡើងអំពីភាពអវិជ្ជមាន និងភាពមិនប្រក្រតីជាច្រើន ពាក់ព័ន្ធប្រព័ន្ធបោះឆ្នោតនៅកម្ពុជា រយៈពេល៣អាណត្តិចុងក្រោយ ដែលកម្ពុជារៀបចំដោយខ្លួនឯង ហើយទាមទារឲ្យមានការកែទម្រង់ជាបន្ទាន់ ទើបអាចធានានូវភាពយុត្តិធម៌ និងតម្លាភាពសម្រាប់ដំណើរការបោះឆ្នោតជាតិអាណត្តិទី៥ ថ្ងៃទី២៨ ខែកក្កដា នាពេលខាងមុខនេះ។

របាយការណ៍កម្រាស់១៧ទំព័រ របស់លោក សុរិយា ស៊ូប៊ែរឌី បានលើកឡើងពីភាពមិនប្រក្រតីនិងភាពចន្លោះប្រហោងនៃប្រព័ន្ធបោះឆ្នោតដែលត្រូវធ្វើការកែទម្រង់ឲ្យបានទាន់ពេលវេលាហើយក្នុងនោះក៏បាន លើកឡើងនូវលក្ខខណ្ឌសំខាន់ៗចំនួន២ គឺទី១ ត្រូវធ្វើការកែទម្រង់ប្រព័ន្ធបោះឆ្នោតដែលក្នុងនោះ ត្រូវធ្វើវិសោធនកម្មច្បាប់រៀបចំផ្លាស់ប្តូរសមាសភាព គ.ជ.ប ឲ្យមានអព្យាក្រឹត និងឯករាជ្យតាំងពីថ្នាក់ជាតិ រហូតដល់ថ្នាក់មូលដ្ឋាន និងមានការកែប្រែទម្រង់ការរៀបចំបោះឆ្នោតឲ្យបានត្រឹមត្រូវឡើងវិញ រាប់តាំងពីការចុះបញ្ជីឈ្មោះអ្នកបោះឆ្នោតរហូតដល់ការប្រកាសលទ្ធផលបោះឆ្នោត។ ទី២ ត្រូវអនុញាតិឲ្យលោក សម រង្ស៊ី ដែលជាមេដឹកនាំគណបក្សប្រឆាំងដ៏សំខាន់ អាចវិលត្រឡប់មកកាន់ប្រទេសកម្ពុជាវិញ ដោយសុវត្ថិភាពដើម្បីចូលរួមប្រកួតប្រជែងក្នុងការបោះឆ្នោត ដោយផ្ទាល់និងពេញលេញ តាមរយៈការទម្លាក់ចោលនូវបទចោទប្រកាន់ផ្សេងៗ ដែលសហគមន៍អន្តរជាតិមើលឃើញថា ជាដំណើរការកាត់ទោសដោយហេតុផលនយោបាយ។ មេដឹកនាំពិភពលោក ជាពិសេសគណៈកម្មាធិការសភាអន្តរ ជាតិ ដើម្បីការបោះឆ្នោតដោយប្រជាធិបតេយ្យនៅកម្ពុជា បានគាំទ្រយ៉ាងពេញទំហឹងចំពោះអនុសាសន៍របស់លោក សុរិយា ស៊ូប៊ែរឌី ដោយបានដាក់សម្ពាធឲ្យក្រុមអ្នកកាន់អំណាចនៅស្រុកខ្មែរ ធ្វើការកែទម្រង់ប្រព័ន្ធបោះឆ្នោតឲ្យស្របតាមអនុសាសន៍របស់លោក សុរិយា ស៊ូប៊ែរឌី ដើម្បីរៀបចំការបោះឆ្នោតមួយដែលមានភាពសេរីត្រឹមត្រូវ និងយុត្តិធម៌នាខែកក្កដា ខាងមុខនេះ។

គណបក្សសង្គ្រោះជាតិ បានធ្វើមហាបាតុកម្ម កាលពីថ្ងៃទី២៤ ខែមេសា ឆ្នាំ២០១៣ កន្លងទៅនេះ ដើម្បីទាមទារឲ្យមានការកែទម្រង់ប្រព័ន្ធបោះឆ្នោតឲ្យស្របតាមអនុសាសន៍របស់លោក សុរិយា ស៊ូប៊ែរឌី ដែលក្នុងនោះគណបក្សសង្គ្រោះជាតិបានលើកឡើងនូវគោលការណ៍សំខាន់ៗចំនួន ៤ ចំណុចដើម្បីឲ្យបក្សកាន់អំណាចរៀបចំផ្លាស់ប្តូរសមាសភាព គ.ជ.ប តាំងពីថ្នាក់ជាតិរហូតដល់ថ្នាក់មូលដ្ឋានត្រូវពន្យារពេលរៀបចំការបោះឆ្នោត ដើម្បីរៀបចំចុះឈ្មោះអ្នកបោះឆ្នោតឡើងវិញ។ យ៉ាងណាក៏ដោយ ការទាមទាររបស់គណបក្សសង្គ្រោះជាតិ ត្រូវបាន គ.ជ.ប បដិសេធភ្លាមៗដោយអះអាងថា ជាការទាមទារដដែលៗ ប៉ុន្តែការទាមទារបែបនេះ គ.ជ.ប មិនមានឆន្ទៈកែទម្រង់ឲ្យបានសមស្របនោះទេ បើទោះបីជាសហគមន៍អន្តរជាតិ តំណាងសង្គមស៊ីវិល និងតំណាងគណបក្សនយោបាយ បានធ្វើការតវ៉ារៀងរាល់ការបោះឆ្នោត ដែលកម្ពុជារៀបចំដោយខ្លួនឯង ហើយការកែទម្រង់ប្រព័ន្ធបោះឆ្នោត គឺជាចំណុចខ្សោយដ៏សំខាន់មួយដែលអាចនាំឲ្យគណបក្សប្រជាជនកម្ពុជា បរាជ័យក្នុងការបោះឆ្នោត ទើបគេរក្សាទុកប្រព័ន្ធបោះឆ្នោតនិងសមាសភាព គ.ជ.ប ដែលភាគច្រើន មានទំនោរការពារផលប្រយោជន៍របស់គណបក្សកាន់អំណាច។

លោកប្រធាន សម រង្ស៊ី ធ្លាប់បានបញ្ជាក់ថា ការកែទម្រង់ប្រព័ន្ធបោះឆ្នោត គឺអាស្រ័យទៅលើឆន្ទៈនយោបាយ ហើយអ្វីៗអាចប្រែប្រួលក្នុងរយៈពេល១វិនាទី ប៉ុណ្ណោះ ព្រោះ ថា មានផ្លូវចំនួន២ដែលលោក ហ៊ុន សែន ត្រូវជួបភាពបរាជ័យក្នុងការបោះឆ្នោតនាពេលខាងមុខនេះ ទោះជាលោក ហ៊ុន សែន ព្យាយាមរៀបចំ ការបោះឆ្នោតតាមរបៀបក្លែងបន្លំផ្ទុយពីគោលការណ៍ប្រជាធិបតេយ្យ ក៏លោក ហ៊ុន សែន មិនអាចទទួលបានភាពស្របច្បាប់សម្រាប់រដ្ឋាភិបាលថ្មី ដែលកើតចេញពីការបោះឆ្នោតក្លែងបន្លំនោះដែរ។ រដ្ឋាភិបាលដែលមិនមានភាពស្របច្បាប់ គឺមិនអាចទៅខ្ចីបុល ឬសុំប្រាក់ជំនួយពីបរ ទេសបានទេ ហើយការដឹកនាំរបស់លោក ហ៊ុន សែន ត្រូវដួលរលំដោយសារតែវិបត្តិសេដ្ឋកិច្ច នាំឲ្យមានការផ្លាស់ប្តូរដ៏ធំមួយ។ ក្នុងករណីដែលលោក ហ៊ុន សែន កែទម្រង់ប្រព័ន្ធបោះឆ្នោតឲ្យស្របតាមអនុសាសន៍របស់សហគមន៍អន្តរជាតិ គឺបក្សសង្គ្រោះជាតិនឹងត្រូវឈ្នះឆ្នោតយ៉ាងភ្លូកទឹកភ្លូកដី ដែលនៅពេលនោះគណបក្សកាន់អំណាចក៏ត្រូវទទួលភាពបរាជ័យនាំឲ្យមានការផ្លាស់ប្តូរដូចគ្នា គឺជាការផ្លាស់ប្តូរដោយសន្តិវិធីគ្មានការបង្ហូរឈាមឡើយ។

សម្រាប់ការរៀបចំធ្វើមហាបាតុកម្មនាថ្ងៃទី២០ ឧសភា ឆ្នាំ២០១៣ នេះគណបក្សសង្គ្រោះជាតិបានរក្សាការទាមទារដូចអំឡុងពេលធ្វើមហាបាតុកម្មកាលពីលើកមុន គឺបន្តទាមទារឲ្យ គ.ជ.ប ធ្វើការកែលំអនូវចំណុចមួយចំនួនជាកិច្ចស្វះស្វែងចង់ឲ្យមានការបោះឆ្នោតជាតិអាណត្តិទី៥ នាថ្ងៃទី២៨ កក្កដា ឆ្នាំ២០១៣ មានភាពសេរីត្រឹមត្រូវ និងយុត្តិធម៌។ គណបក្សសង្គ្រោះជាតិ បានគិតគូរអំពីការធ្វើមហាបាតុកម្មទាមទារឲ្យមានការកែទម្រង់ប្រព័ន្ធបោះឆ្នោតនៅពេលនេះ ក៏ព្រោះតែប្រជារាស្រ្តខ្មែរទូទៅ បានសម្តែងការមិនពេញចិត្តចំពោះការបោះឆ្នោត ប៉ុន្មានអាណត្តិមកនេះ ដែលផ្ទុយពីឆន្ទៈរបស់ពួកគេ ព្រោះគណបក្សកាន់អំណាចបានព្យាយាម រក្សាទុកប្រព័ន្ធបោះឆ្នោតមួយដើម្បីការពារប្រយោជន៍របស់ខ្លួន និងបន្តតោងអំណាចដឹកនាំប្រទេសកម្ពុជាឲ្យបានយូរឆ្នាំទៅតាមមហិច្ឆតារបស់ខ្លួន។

ការទាមទាររបស់គណបក្សសង្គ្រោះជាតិ តាមរយៈមហាបាតុកម្មទាំង២លើកនេះ គឺប្រាថ្នាចង់ឲ្យប្រទេសកម្ពុជាមានការបោះឆ្នោតដោយសេរី និងយុត្តិធម៌ ស្របតាមគោលការណ៍នៃលទ្ធិប្រជាធិបតេយ្យ ធ្វើឲ្យលទ្ធផលបោះឆ្នោតនាពេលខាងមុខនេះ ស្របតាមឆន្ទៈរបស់រាស្រ្តខ្មែរទូទៅ។ គេមើលមិនឃើញ ពីសញ្ញាវិជ្ជមានណាមួយដែលថាការបោះឆ្នោតនាពេលខាងមុខនេះ មានភាពសេរីនិងយុត្តិធម៌នោះទេ ព្រោះថាបញ្ជីឈ្មោះអ្នកបោះឆ្នោតមានភាព មិនប្រក្រតី មានឈ្មោះជនអន្តោប្រវេសន៍មានឈ្មោះខ្មោច ហើយប្រជាពលរដ្ឋខ្មែរប្រមាណ ១,២លាននាក់ ត្រូវបានគេរកឃើញថា បាត់ឈ្មោះមិនអាចប្រើសិទ្ធិសេរីភាពរបស់ខ្លួនទៅបោះឆ្នោតសម្រេចជោគវាសនាប្រទេសជាតិ និងអនាគតខ្លួនឯងនោះ ទេ។ លោកប្រធាន សម រង្ស៊ី ធ្លាប់បានលើកឡើងអំពីបទពិសោធន៍នៅក្នុងប្រទេសបង់ក្លាដេស ដែលគេរៀបចំចុះឈ្មោះអ្នកបោះឆ្នោតឡើងវិញ ហើយសម្រាប់ប្រទេសកម្ពុជា ដែលមានអ្នកបោះឆ្នោតប្រមាណ ៩លាននាក់ អាចចំណាយពេល ១ខែឬ២ខែប៉ុណ្ណោះ ដើម្បីរៀបចំចុះបញ្ជីឈ្មោះអ្នកបោះឆ្នោតឲ្យមានតម្លាភាព ដើម្បីធានាថាប្រជាពលរដ្ឋខ្មែរទូទៅមានសិទ្ធិទៅចូលរួមបោះឆ្នោតជ្រើសរើសមេដឹកនាំដែលមានសមត្ថភាពដើម្បីសម្រេចអនាគតខ្លួនឯង៕

ឧកញ៉ា ញឹក ផន ហៅកៅ មានសិទ្ធិអំណាចធំធេងក្នុងការដឹកដីខ្សាច់បំផ្លាញផ្លូវជាច្រើនខ្សែក្នុងខណ្ឌសែនសុខ

មនសិការខ្មែរ — Sun, 19 May 2013 04:42:21 +0000

ច្រើនឆ្នាំមកហើយដែលលោកឧកញ៉ា ញឹក ផន ហៅកៅ ជាមន្ត្រីយោធាដ៏មានឥទ្ធិពលបានរកស៊ីដឹកជញ្ជូនដីនិងខ្សាច់បំផ្លាញផ្លូវជាច្រើនខ្សែក្នុងខណ្ឌសែនសុខ ដូចជាផ្លូវទំនប់កប់ស្រូវ ផ្លូវម៉ុងប្ញទ្ធី និងផ្លូវភ្នំ ពេញហាណូយ ប៉ុន្តែគេមិនដែលឃើញអាជ្ញាធរនិងសមត្ថកិច្ចពាក់ព័ន្ធយកចិត្តទុកដាក់បង្ក្រាបនិងទប់ស្កាត់ការដឹកជញ្ជូនដីផ្ទុកលើសទម្ងន់បំផ្លាញផ្លូវរបស់ប្រជាពលរដ្ឋ ឲ្យមានប្រសិទ្ធភាពនោះទេ។ សូម្បីតែលោក លី សាវ៉េត ជាអភិបាលខណ្ឌសែនសុខក៏មិនដែលអើពើពីការដឹកជញ្ជូន លើសទម្ងន់ប៉ះពាល់ការរស់នៅរបស់ពលរដ្ឋរបស់លោកឧកញ៉ា ញឹក ផន ហៅកៅនោះទេ ហើយមិនដឹងជាមានអាថ៌កំបាំងអ្វីឡើយ។

ប្រជាពលរដ្ឋបានរាយការណ៍ថា ក្នុងមួយថ្ងៃៗលោក ញឹក ផន ហៅកៅ បានដឹកជញ្ជូនដី ចេញពីអតីតបុរីឡុងឈិន យកទៅចាក់បំពេញតាមដីឡូត៍ជាច្រើនកន្លែងក្នុងខណ្ឌសែនសុខ ដែលក្នុងមួយថ្ងៃៗមានចំនួនរាប់ពាន់ឡានដឹកជញ្ជូនលើសទម្ងន់ធ្លាក់ដីរាយប៉ាយពេញផ្លូវធ្វើឲ្យរអិលនៅពេលភ្លៀងធ្លាក់ ហើយនៅពេលក្តៅហ៊ុយស្ទើរងងឹតមេឃ ប៉ះពាល់ការរស់នៅប្រជាពលរដ្ឋនិងអ្នកដំណើរតាមដងផ្លូវច្រើនឆ្នាំមកហើយ។ រថយន្តដឹកជញ្ជូនដីរបស់លោក ញឹក ផន ហៅកៅ ពេលខ្លះបើកប្រជែងគ្នាជា២ជួរ បង្កឲ្យមានគ្រោះថ្នាក់ដល់អ្នកដំណើរជាញឹកញាប់ ហើយកាលពីប៉ុន្មានខែមុននេះ រថយន្តដឹកដីរបស់លោក ញឹក ផន ហៅកៅ បានបើកបុកគ្នាផ្ទុះឆេះបង្កការភ័យខ្លាចចំពោះប្រជាពលរដ្ឋនិងអ្នកដំណើរគួរឲ្យរន្ធត់បំផុត។

ការដឹកជញ្ជូនដីរបស់ឧកញ៉ា ញឹក ផន ហៅកៅ មិនមានការទទួលខុសត្រូវនោះទេ ដូចរូបភាពជាក់ស្តែងនៅលើកំណាត់ផ្លូវភ្នំពេញ ហាណូយ ចេញពីទំនប់កប់ស្រូវឆ្លងកាត់សង្កាត់ ឃ្មួញ និងសង្កាត់ភ្នំពេញថ្មី មានរថយន្តដឹកដីច្រើនសន្ធឹកសន្ធាប់ធ្វើចរាចរណ៍បន្តកន្ទុយគ្នា បណ្តាលឲ្យមានការកកស្ទះចរាចរណ៍ និងមានគ្រោះថ្នាក់ដល់អ្នកដំណើរជាញឹកញាប់ ហើយនៅលើកំណាត់ផ្លូវភ្នំពេញ ហាណូយ មានតែរថយន្តរបស់លោក ញឹក ផន ហៅកៅ ប៉ុណ្ណោះដែលអាច ធ្វើសកម្មភាពដឹកជញ្ជូនដីឆ្លងកាត់ទីនោះបានទាំងយប់ទាំងថ្ងៃមិនដែលខ្វល់ខ្វាយពីច្បាប់ទម្លាប់អ្វីទេ។ មន្ត្រីអាជ្ញាធរមួយចំនួនក៏បានសម្តែងការខឹងសម្បាយ៉ាងខ្លាំងចំពោះសកម្មភាពរបស់លោក ញឹក ផន ហៅកៅ ដែលតែងតែដឹកជញ្ជូនដីបំផ្លាញផ្លូវនៅក្នុងខណ្ឌសែនសុខហើយផ្លូវជាច្រើនខ្សែ ត្រូវបានស្ថាបនាឡើងតាមរូបមន្ត ៥០បូក៥០ ឬជាផ្លូវដែលសាងសង់ដោយប្រជាពលរដ្ឋ បច្ចុប្បន្ននេះរងនូវការខូចខាតជាច្រើនកន្លែងគ្មាននរណាហ៊ានហើបមាត់នោះទេ បានត្រឹមតែសម្តែងភាពក្តៅក្រហាយប៉ុណ្ណោះ។

សាលារាជធានីភ្នំពេញ ធ្លាប់បានដាក់កំហិតឲ្យក្រុមហ៊ុនដឹកជញ្ជូនដី ថ្ម ក្រួស ខ្សាច់ ដែលធ្វើអាជីវកម្មនៅក្នុងរាជធានីភ្នំពេញគ្រប់ប្រភេទ មិនត្រូវផ្ទុកលើសទម្ងន់ ៧ម៉ែត្រគូបនោះទេ ដើម្បីថែរក្សាផ្លូវដែលត្រូវបានសាងសង់ដោយថវិកាសប្បុរសជន មូលនិធិសង្កាត់ និងសាលារាជធានីភ្នំពេញ ប៉ុន្តែជាក់ស្តែងសកម្មភាពដឹក ជញ្ជូនដីរបស់លោក ញឹក ផន ហៅកៅ លើសពីការកំណត់ជ្រុះរាយប៉ាយ ពេញផ្លូវ ប៉ះពាល់សណ្តាប់ធ្នាប់សាធារណៈ និងការធ្វើដំណើររបស់ប្រជាពលរដ្ឋ គ្មានសមត្ថកិច្ចណាមួយអើពើ ហ៊ានចាត់វិធានការចំពោះការដឹកជញ្ជូនលើសទម្ងន់របស់លោក ញឹក ផន ហៅកៅ នោះទេ។ មិនត្រឹមតែផ្លូវភ្នំពេញហាណូយនោះទេ ដែលកំពុងរងនូវការបំផ្លិចបំផ្លាញពីកាដឹកជញ្ជូនដីរបស់លោក ញឹក ផន ហៅកៅ សូម្បីតែផ្លូវកៅស៊ូមួយខ្សែទៀត ដែលគេស្គាល់ថាជាផ្លូវ ម៉ុង ប្ញទ្ធី ក៏មានរថយន្តដឹកជញ្ជូនដីរបស់លោក ញឹក ផន ហៅកៅ បើកបរឆ្លងកាត់ក្នុងមួយថ្ងៃៗរាប់ពាន់គ្រឿង គឺបើកបន្តកន្ទុយគ្នាហុយស្ទើរតែងងឹតមេឃ រកតែជិះម៉ូតូឆ្លងកាត់សឹងមិនបានផង គេមិនដឹងថា នរណាជាអ្នកផ្តល់សិទ្ធិអំណាចឲ្យលោក ញឹក ផន ហៅកៅ ធ្វើបែបនេះទេ។

យ៉ាងណាក៏ដោយប្រជាពលរដ្ឋបានទទូចសុំឲ្យលោក ប៉ា សុជាតិវង្ស អភិបាលរាជធានីភ្នំពេញ យកចិត្តទុកដាក់ពិនិត្យមើលសកម្មភាពដឹកជញ្ជូនដីផ្ទុកលើសទម្ងន់ របស់លោក ញឹក ផន ហៅកៅ ឡើងវិញផងព្រោះ វាកំពុងបង្កផលប៉ះពាល់ខ្លាំងសម្បើមណាស់ដល់អ្នកដំណើរនិងប្រជាពលរដ្ឋហើយបញ្ហានេះក៏ធ្វើឲ្យផ្លូវជាច្រើន ខ្សែនៅក្នុងខណ្ឌសែនសុខ រងនូវការខូចខាតបាក់ស្រុត គួរឲ្យសោកស្តាយជាទីបំផុត។ សូមបញ្ជាក់ថា លោក ញឹក ផន ហៅកៅ ក៏មានទីតាំងស្តុកខ្សាច់ជាច្រើនកន្លែងក្នុងខណ្ឌប្ញស្សី កែវ ដូចជានៅចំណុចគល់ស្ពានព្រែក ព្នៅជាដើម ហើយនៅភាគខាងជើង រាជធានីភ្នំពេញ ចាប់ពីគល់ស្ពានជ្រោយចង្វា មានតែលោក ញឹក ផន ហៅកៅ ប៉ុណ្ណោះ ដែលមានសិទ្ធិអំ ណាចដឹកជញ្ជូនខ្សាច់យកទៅលក់ចែកចាយនៅតាមការដ្ឋានសំណង់ផ្សេងៗហើយលោក ញឹក ផន ហៅកៅ ក៏មានសិទ្ធិអំណាចកាយដី អតីតបុរីឡុងឈិន ជ្រៅធ្លាយក្បាលប្រេត ដើម្បីដឹកជញ្ជូនយកទៅចាក់បំពេញតាមដីឡូត៍ក្នុងខណ្ឌសែនសុខ ខណ្ឌដង្កោ និងខណ្ឌប្ញស្សីកែវ ដោយផ្ទុកលើសទម្ងន់បំផ្លាញផ្លូវជាច្រើនខ្សែផ្ទុយពីគោលការណ៍ណែនាំរបស់សាលារាជធានីភ្នំពេញ ធ្វើឱ្យផ្លូវរងការខូចខាតជាបន្តបន្ទាប់៕

សម្រែកផ្តេសផ្តាសរបស់លោក ហ៊ុន សែន មួយរយៈពេលចុងក្រោយនេះគឺជាផ្នែកមួយកើតចេញពីសេចក្តីព្រួយបារម្ភខ្លាចចាញ់ឆ្នោតបាត់បង់អំណាច

មនសិការខ្មែរ — Sun, 19 May 2013 04:40:12 +0000

នៅក្រោយពេលដែលការញុះញង់បំបែកបំបាក់ផ្ទៃក្នុងគណបក្សសង្គ្រោះជាតិ ត្រូវទទួលបរាជ័យដោយសារតែថ្នាក់ដឹកនាំ និងមន្ត្រីជាន់ខ្ពស់គណបក្សសង្គ្រោះជាតិបានដឹងច្បាស់ពីល្បិចកលអាក្រក់របស់លោក ហ៊ុន សែន ស្រាប់តែលោក ហ៊ុន សែន ប្រើយុទ្ធសាស្រ្តថ្មីទៀតដើម្បីគំរាមកំហែងលើបក្សប្រឆាំងយ៉ាងទទឹងទិស។ ជាក់ស្តែង ក្នុងពិធីមួយនៅស្រុកព្រះស្តេច ខេត្ត ព្រៃវែង កាលពីថ្ងៃទី១៦ ខែឧសភា ឆ្នាំ២០១៣ លោក ហ៊ុន សែន បានចោទប្រកាន់មនុស្សមួយចំនួននៅសហរដ្ឋអាមេរិកថាគឺជាអ្នកចង់ផ្តួល រំលំរដ្ឋាភិបាលរបស់គណបក្សប្រជាជនកម្ពុជា និងរបបរាជានិយមនៅក្នុងប្រទេសកម្ពុជាសព្វថ្ងៃ។ ក៏ប៉ុន្តែសម្រែកផ្តេសផ្តាសរបស់លោក ហ៊ុន សែន ត្រូវបានមន្ត្រីជាន់ខ្ពស់គណបក្សសង្គ្រោះជាតិដែលជាគូប្រជែងដ៏ខ្លាំងក្លាជាមួយគណបក្សកាន់អំណាចវាយតម្លៃថាជាល្បិចនយោបាយរបស់លោក ហ៊ុន សែន រៀបចំទុកដូចអ្វីដែលលោកធ្លាប់បានធ្វើនាពេលកន្លងមកតែប៉ុណ្ណោះ។

សូមបញ្ជាក់ថានៅក្នុងពិធីមួយកាលពីថ្ងៃទី១៦ ខែឧសភា លោក ហ៊ុន សែន អនុប្រធានគណបក្សប្រជាជន និងជានាយករដ្ឋមន្ត្រីដែលកំ ពុងគ្រប់គ្រងអំណាចបានអំពាវនាវសុំកិច្ចអន្តរាគមន៍ពីសហរដ្ឋអាមេរិក ឱ្យចាត់វិធានការប្រឆាំងមនុស្សមួយ ក្រុមដែលគាត់រកឃើញថាកំពុងរៀបចំគម្រោងផ្តួលរំលំរដ្ឋាភិបាលបច្ចុប្បន្នរបស់គាត់ និងរាជបល្ល័ង្កនៅកម្ពុជា ហើយថាពួកនោះកំពុងពួនសម្ងំនៅក្នុងគណបក្សប្រឆាំង។ លោក ហ៊ុន សែន បានស្រែកជាសាធារណៈទៀតថា អ្នកដែលចង់ផ្តួលរំលំរដ្ឋាភិបាលរបស់គណបក្សប្រជា ជនកម្ពុជានៅពេលនេះ គឺជាអ្នកឱ កាសនិយម ហើយគាត់នឹងមិនអត់ឱនឱ្យនោះឡើយ។ លោក ហ៊ុន សែន សុំកិច្ចអន្តរាគមន៍ពីសហរដ្ឋអាមេរិកដើម្បីតាមចាប់ខ្លួនអ្នកទាំងនោះដែលគាត់រកឃើញថាកំពុងរស់នៅសហរដ្ឋអាមេរិក ហើយមួយចំនួនទៀតនៅក្នុងបក្សប្រឆាំង។ ទោះជាយ៉ាងណាលោក ហ៊ុន សែនមិនបាននិយាយចេញឈ្មោះក្រុមមនុស្សដែលគាត់ចោទថាចង់ផ្តួលរំលំរដ្ឋាភិបាលនោះឡើយ ហើយអ្វីៗកំពុងធ្វើឱ្យមជ្ឈដ្ឋានជាតិ និងអន្តរជាតិសង្ស័យថាជាល្បិចកលរបស់លោក ហ៊ុន សែន ក្នុងការធ្វើឱ្យគណបក្សប្រឆាំងចុះខ្សោយដូចដែលគាត់ធ្លាប់ធ្វើកន្លងមក។

មន្ត្រីជាន់ខ្ពស់គណបក្សប្រឆាំងបានចាត់ទុកថាសម្រែករបស់លោក ហ៊ុន សែន ក្នុងពិធីសម្ពោធអគារពុទ្ធិកអនុវិទ្យាល័យសិរីសារពេជ្ញក្នុង ស្រុកព្រះស្តេច ខេត្តព្រៃវែងកាលពីថ្ងៃទី១៦ ខែឧសភា គឺជាល្បិចនយោរបស់លោក ហ៊ុន សែន ដើម្បីបំបាក់សំឡេងគណបក្សប្រឆាំងតែ ប៉ុណ្ណោះ។ លោក យឹម សុវណ្ណ ជាតំណាងរាស្រ្ត និងជាអ្នកនាំពាក្យគណបក្សសង្គ្រោះជាតិ បានហៅសារនយោបាយរបស់លោក ហ៊ុន សែន អនុប្រធានគណបក្សប្រជាជន គឺជាផ្នែកមួយកើតចេញពីការព្រួយបារម្ភខ្លាចចាញ់ឆ្នោត របស់លោក ហ៊ុន សែន។ លោក យឹម សុវណ្ណ បានអះអាងថាគណបក្សប្រឆាំងនឹងមិនជ្រើសរើសយកការឈ្នះឆ្នោតដោយមធ្យោបាយហិង្សានោះទេ គឺគណបក្សប្រឆាំងអាចផ្តួលដៃគូរបស់ខ្លួនតាមរយៈសន្លឹកឆ្នោតដែលកើតចេញពីការសម្រេចចិត្តរបស់ប្រជាពលរដ្ឋ។ លោក យឹម សុវណ្ណ បានបដិសេធថាពុំមានជនសង្ស័យណាមួយនៅក្នុងគណបក្សប្រឆាំងចង់ផ្តួលរំលំរដ្ឋាភិបាលតាមវិធីហិង្សាដូចដែលលោក ហ៊ុន សែន លើកឡើងនោះឡើយ។

លោក យឹម សុវណ្ណ បានមានប្រសាសន៍ទៀតថា ”គោលនយោបាយរបស់គណបក្សសង្គ្រោះជាតិប្រឆាំងដាច់ខាតយន្តការនៃការប្រើប្រាស់កម្លាំងបាយ ដើម្បីឈ្នះ និងចាត់ទុកថាមធ្យោបាយបែបនេះគឺជាបទឧក្រិដ្ឋធ្ងន់ធ្ងរ។ គ្មានអ្នកណាមកនៅក្នុងគណបក្សប្រឆាំង ហើយ គណបក្សប្រឆាំងក៏មិនឱ្យជនបែបនេះនៅក្នុងគណបក្សប្រឆាំងដែរ។ គណបក្សប្រឆាំងមិនចាំបាច់ផ្តួលតាមអំពើហិង្សាទេ ធ្វើមេ៉ចឱ្យតែការ បោះឆ្នោតមានភាពសេរី និងយុត្តិធម៌ គ.ជ.ប ឯករាជ្យ កុំឱ្យលួចបន្លំសន្លឹកឆ្នោត កុំឱ្យគំរាមកំហែងលើគណបក្សប្រឆាំង ហើយគណបក្សនយោបាយអាចប្រើប្រាស់នូវប្រព័ន្ធផ្សព្វផ្សាយ បញ្ជូនសារដល់ប្រជាពលរដ្ឋទៅ គឺគណបក្សប្រជាជនដួលដោយខ្លួនឯង មិនចាំបាច់ធ្វើសង្គ្រាមនោះទេ”។ ក្រុមអ្នកតាមដានស្ថានការណ៍នយោបាយក្នុងប្រទេសកម្ពុជាបានទទួលស្គាល់ថាគណបក្សប្រឆាំងមិនចាំបាច់មានកម្លាំងប្រដាប់អាវុធនោះទេ គឺឱ្យតែការបោះឆ្នោតប្រព្រឹត្តទៅដោយសេរី ត្រឹមត្រូវនិងយុត្តិធម៌អាចធ្វើឱ្យបក្សកាន់អំណាចដួលរំលំខ្លួនឯងយ៉ាងងាយស្រួលស្របទៅតាមឆន្ទៈប្រជាពលរដ្ឋជាមិនខាន។

ក្រុមអ្នកវិភាគឯករាជ្យបានវាយ តម្លៃថាពុំមានសមាជិកគណបក្សប្រឆាំងណាមួយអាចប្រើប្រាស់យន្ត ការប្រដាប់អាវុធ ដើម្បីផ្តួលរំលំរដ្ឋាភិបាលលោក ហ៊ុន សែន នោះទេ ព្រោះតាមពិនិត្យជាក់ស្តែងបក្សប្រឆាំងពុំមានកម្លាំងប្រដាប់អាវុធណាមួយឡើយ។ លោកនាយករដ្ឋមន្ត្រី ហ៊ុន សែន អាចបំផ្លាញអង្គការចាត់តាំងឈ្មោះថាស៊ីអេហ្វអេហ្វ (CFF) កាលពីឆ្នាំ២០០០ ក៏ប៉ុន្តែសម្រាប់ឆ្នាំ២០១៣នេះ មិនអាចមានរឿងដដែលកើតឡើងបានទេ។ ប្រសិនបើមានហេតុការណ៍ណាមួយកើតឡើងអាចជាល្បិចរបស់គណបក្សកាន់អំណាចធ្វើឡើងដើម្បីទម្លាក់កំហុសលើគណបក្សប្រឆាំងតាមរបៀបស្វា ស៊ីបាយលាបមាត់ពពែ ដែលបញ្ហានេះ គណបក្សប្រឆាំងត្រូវមានការប្រុងប្រយ័ត្ន។ ក្រុមអ្នក វិភាគឯករាជ្យ បានសម្តែងសេចក្តីព្រួយបារម្ភថាបក្សកាន់អំណាចអាច រកវិធីសព្វបែបយ៉ាង ដើម្បីបំបាក់កម្លាំងរបស់គណបក្សប្រឆាំង នៅពេលដែលមើលឃើញថាគណបក្ស ប្រឆាំងទទួលបានការគាំទ្រពីប្រជាពលរដ្ឋខ្មែរនៅទូទាំងប្រទេសហើយ សូម្បីតែជនរួមជាតិខ្មែរ នៅក្រៅប្រទេសក៏ចូលរួមគាំទ្រគណបក្សសង្គ្រោះជាតិគួរឱ្យកត់សម្គាល់ដែរ។

ក្រុមអ្នកតាមដានស្ថានភាពនយោបាយក្នុងប្រទេសកម្ពុជាបានលើកឡើងថាតាមសន្ទុះគាំទ្រគណបក្សសង្គ្រោះជាតិនាពេលនេះ គឺគណបក្សសង្គ្រោះជាតិ អាចយកឈ្នះលើគណបក្សប្រជាជនតាមការ គ្រោងទុកប្រសិនបើការបោះឆ្នោតប្រព្រឹត្តទៅដោយសេរីត្រឹមត្រូវ និងយុត្តិធម៌។ នៅពេលដែលមើលឃើញថាគណបក្សប្រឆាំងកាន់តែមានប្រជាប្រិយភាព ទើបលោក ហ៊ុន សែន ប្រើវិធីសព្វបែបយ៉ាងដើម្បីទប់សន្ទុះគាំទ្របក្សសង្គ្រោះជាតិ។ បើទោះបីលោក ហ៊ុន សែនមិនបញ្ជាក់ អំពីក្រុមប្រដាប់អាវុធដែលមាន គម្រោងផ្តួលរំលំរដ្ឋាភិបាលថាកំពុងស្ថិតនៅក្នុងគណបក្ស ណាមួយក៏មជ្ឈដ្ឋានជាតិ និងអន្តរជាតិអាចវាយតម្លៃបានថា ជាការសម្តៅលើគណបក្សសង្គ្រោះជាតិដែលមានលោក សម រង្ស៊ី ជាប្រធានសព្វថ្ងៃនេះ។ ដោយហេតុថាក្រៅពីគណបក្សសង្គ្រោះជាតិពុំមានគណបក្សណាមួយដែលអាច ប្រកួតប្រជែងជាមួយគណបក្សប្រជាជនបានទេ ហើយគណបក្សតូចៗ មួយចំនួន ត្រូវបានគេដឹងថាជាកូនជឹងរបស់គណបក្សប្រជាជន ដើម្បីឱ្យគេមើលឃើញថាមានគណបក្សច្រើនចូលរួមក្នុងការបោះឆ្នោត។

មន្ត្រីជាន់ខ្ពស់គណបក្សប្រឆាំង បានលើកឡើងថាប្រសិនបើមានការបោះឆ្នោតដោយសេរីត្រឹមត្រូវ និងយុត្តិធម៌ គឺគណបក្សសង្គ្រោះជាតិអាចយកឈ្នះលើគណបក្សប្រជាជនដោយស្រួល ស្របតាមឆន្ទៈរបស់ពលរដ្ឋជាមិនខាន។ ហេតុនេះ ហើយទើបគណបក្សសង្គ្រោះជាតិជំរុញឱ្យមានការ កែទម្រង់ប្រព័ន្ធបោះឆ្នោត និងផ្លាស់ប្តូរសមាសភាពថ្នាក់ដឹកនាំ គណៈកម្មាធិការជាតិរៀបចំការបោះឆ្នោត (គ.ជ.ប) ឱ្យស្របតាមអនុសាសន៍របស់លោក សុរិយា ស៊ូប៊ែរឌី អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា។នៅដែលមានការកែទម្រង់ប្រព័ន្ធបោះឆ្នោត និងមានការផ្លាស់ប្តូសមាសភាពថ្នាក់ដឹកនាំ គ.ជ.ប និងមន្ត្រី គ.ជ.ប គ្រប់លំដាប់ថ្នាក់ គឺគណបក្សកាន់អំណាចមិនអាចយកឈ្នះគណបក្សសង្គ្រោះជាតិបានឡើយ ព្រោះពលរដ្ឋខ្មែរភាគច្រើនលើសលប់មានការភ្ញាក់រលឹកត្រៀមបោះឆ្នោតតាមឆន្ទៈរបស់ខ្លួន។ ដូច្នេះអ្វីដែលលោក ហ៊ុន សែន ស្រែកផ្តេសផ្តាសជាបន្តបន្ទាប់កន្លងមកនេះ គឺមានហេតុផលតែមួយគត់ព្រួយបារម្ភខ្លាចចាញ់ឆ្នោតបាត់បង់អំណាចនៅថ្ងៃទី២៨ ខែកក្កដាខាងមុខ។

មន្ត្រីជាន់ខ្ពស់គណបក្សសង្គ្រោះ ជាតិបានវែកញែកថា ជារឿងមិនអាចទៅរួចទេដែលគេចោទថាមានក្រុមប្រដាប់អាវុធនៅក្នុងគណបក្សប្រឆាំង ព្រោះគោលនយោបាយរបស់គណបក្សប្រឆាំងគឺត្រូវប្រកួតប្រជែង ជាមួយគណបក្សកាន់អំណាចតាមរយៈការបោះឆ្នោតដោយសន្តិវិធី។ ជាមួយគ្នានេះក្រុមអ្នកនយោបាយជើងចាស់ មួយចំនួនបានរិះគន់ថាលោក ហ៊ុន សែន មិនគួរប្រើប្រាស់ល្បិចកលលាបពណ៌លើខ្មែរដូចគ្នាតទៅទៀតទេ ហើយអ្វីដែលលោក ហ៊ុន សែន ត្រូវធ្វើនៅពេលនេះ គឺត្រូវរៀបចំឱ្យការបោះឆ្នោតប្រព្រឹត្តទៅដោយសេរីត្រឹមត្រូវ និងយុត្តិធម៌ពិតប្រាកដ។ ប្រសិនបើគណបក្សប្រជាជនកម្ពុជាមានអ្នកគាំទ្រជាង៥,៦លាននាក់ ដូចដែលមន្ត្រីជាន់ខ្ពស់គណបក្សនេះអួតអាងពិតមែនគឺគួរតែបើកឱ្យមានការ ប្រកួតប្រជែងស្មើភាពនៅក្នុងការបោះ ឆ្នោត ហើយត្រូវបើកផ្លូវឱ្យលោក សម រង្ស៊ី វិលត្រឡប់មកចូលរួមក្នុងការបោះឆ្នោតដោយឥតលក្ខខណ្ឌស្របតាមការជំរុញរបស់អង្គការសហប្រជាជាតិ សហរដ្ឋអាមេរិក និងសហគមន៍អន្តរជាតិ៕

លោក សុន ឆ័យ អះអាងថាតាមការពិនិត្យជាក់ស្តែងកម្ពុជាពិតជាបាត់បង់ទឹកដីតាមព្រំដែនមួយផ្នែកទៅប្រទេសសៀម

មនសិការខ្មែរ — Sun, 19 May 2013 04:38:27 +0000

បញ្ហាព្រំដែនកម្ពុជាជាមួយប្រទេសជិតខាងនៅតែជារឿងមិនទាន់ដោះស្រាយឱ្យបានជ្រះស្រឡះនៅឡើយ បើទោះបីការបោះបង្គោលព្រំដែនគោកកម្ពុជា-យួន ជិតឈានដល់ទីបញ្ចប់រួចទៅហើយក៏ដោយ។ជាក់ស្តែងទាក់ទងទៅនឹងការបោះបង្គោលព្រំដែនគោកកម្ពុជា-យួន ចាប់តាំងពីខែកញ្ញាឆ្នាំ២០០៦ រហូតមកបានធ្វើឱ្យប្រជាពលរដ្ឋខ្មែររស់នៅតាមតំបន់ព្រំដែននៅខេត្តស្វាយរៀងនិងខេត្តកំពង់ចាមត្អូញត្អែរពីការ បាត់ដីស្រែកេរដូនតាអស់ជាច្រើនហិកតា ហើយអំពាវនាវឱ្យរាជរដ្ឋាភិបាលលោក ហ៊ុន សែន ចាត់វិធានការ យកដីស្រែរបស់ពួកគាត់មកវិញ។ ឥឡូវនេះមន្ត្រីជាន់ខ្ពស់គណបក្សសង្គ្រោះជាតិបានអះអាងថាបង្គោលព្រំដែនដែលកំណត់ព្រំសីមា រវាងប្រទេសកម្ពុជា និងសៀម គឺភាគច្រើនពុំមែនជាបង្គោលឡាក់ចាស់ដែលកំណត់ដោយអាណានិគមបារាំងនោះឡើយ។ មន្ត្រីជាន់ខ្ពស់គណបក្សសង្គ្រោះជាតិបានសម្តែងសេចក្តីព្រួយបារម្ភអំពីការបាត់បង់បូរណភាពទឹកដីនៅជាប់ព្រំដែនសៀម ដោយសារតែរដ្ឋាភិបាលមិនយកចិត្តទុកដាក់ការពារបូរណភាពទឹកដីឱ្យបានដិតដល់នោះទេ។

លោក សុន ឆ័យ ប្រធានក្រុមតំណាងរាស្រ្តគណបក្សសមរង្ស៊ី និងជាមន្ត្រីជាន់ខ្ពស់គណបក្សសង្គ្រោះ ជាតិបានមានប្រសាសន៍នៅថ្ងៃទី១៦ ខែឧសភា ឆ្នាំ២០១៣ថា ផ្អែកតាមការពិនិត្យជាក់ស្តែងរបស់លោករកឃើញថាកម្ពុជាពិតជាត្រូវបាត់បង់ទឹកដីមួយផ្នែកទៅប្រទេសសៀមមែន។ លោកបានបញ្ជាក់ថាដូចជានៅបង្គោលឡាក់លេខ៦៦ និងលេខ៦៧នៅចំណុចសង្កាត់បរយាខាក្រុង ប៉ៃលិន គឺបង្គោលឡាក់ទាំងនោះពិតជាត្រូវបានកែច្នៃ ពោលគឺពុំមែនជាបង្គោលចាស់ដែលកំណត់ដោយរដ្ឋការបារាំងនោះទេ ព្រោះលោកពិនិត្យឃើញថាមានស្នាមប្រះដាច់ដោយកង់ៗ និងអាចលួចរំកិលនៅមុនឆ្នាំ១៩៧៩។ លោក សុន ឆ័យ បញ្ជាក់ថា “រុកតាមចំការពោតហើយចុះទៅដល់ឃើញបង្គោលព្រំដែន ហើយក៏ដូចជាមានការពោលប្រាប់ពីប្រជាពលរដ្ឋដែរថា បង្គោលនោះហាក់ដូចជាបង្គោលបង្ខិតដោយពួកថៃ ប្រហែលឆ្នាំ១៩៧៥។ មានស្នាមដែលគេវ៉ៃជ្រុងបង្គោលនោះដើម្បីគេអាចលើកយកបង្គោលនោះទៅបោះនៅទីតាំងថ្មី”។

ការអះអាងរបស់លោក សុន ឆ័យ ដូចខាងលើនេះបានកើតឡើងក្នុងពេលដែលរូបលោករួមជាមួយមន្ត្រី សមាជិកគណបក្សសង្គ្រោះជាតិមួយចំនួនបានចុះពិនិត្យមើលបង្គោលព្រំដែនកម្ពុជា-សៀម នៅថ្ងៃទី១៦ ខែឧសភា បន្ទាប់ពីមានភាពមិនប្រក្រតីកើតឡើងកាលពីចុងខែមីនា ឆ្នាំ២០១៣។ កាលពីខែមីនា អតីតយោធាខ្មែរក្រហមដែលធ្លាប់ឈរជើងនៅតាមតំបន់ព្រំដែនក្នុងខែប៉ៃលិន បានឱ្យដឹងថាភាគីសៀមបានរំកិលព្រំដែនចូលមកក្នុងទឹកដីកម្ពុជាយ៉ាងជ្រៅធ្វើឱ្យកម្ពុជាប្រឈមនឹងការបាត់បង់បូរណភាពទឹកដីទៅភាគីសៀម។ កាលពីថ្ងៃទី២៨ មីនា ឆ្នាំ២០១៣ អតីតមេប៉ុស្តិ៍បរថ្មី ឈ្មោះ មួន ទឹម ត្រូវបានស្នងការនគរបាលខេត្តប៉ៃលិនបញ្ចប់តួនាទី និងបង្ខំឱ្យចុះហត្ថលេខាទទួលកំហុស៤ដងក្នុងមួយថ្ងៃនៅឡើយ។ មូលហេតុនៃការដកហូតតំណែងលោក មួន ទឹម អតីតមេប៉ុស្តិ៍បរថ្មី ដោយសារតែលោកបានអមដំណើរអ្នកយកព័ត៌មាន៣នាក់ ចុះពិនិត្យបង្គោលព្រំដែនលេខ៦៤កាលពីថ្ងៃទី១៦ ខែមីនា។ ទង្វើរបស់ស្នងការនគរបាលខេត្តប៉ៃ លិនកំពុងប្រឈមនឹងការរិះគន់ជុំទិសហើយសកម្មជនព្រំដែននិងមន្ត្រី សង្គមស៊ីវិលរិះគន់ថាអាជ្ញាធរខេត្តប៉ៃលិនកំពុងបិទបាំងករណីភាគីសៀម រំលោភឈ្លានពានទឹកដីខ្មែរ។

អតីតយោធាខ្មែរក្រហម និងកម្លាំងអ្នកតស៊ូប្រឆាំងកងទ័ពយួនឈ្លានពានតាមព្រំដែនកម្ពុជា-សៀមបានបញ្ជាក់ជាបន្តបន្ទាប់អំពីករណីភាគីសៀមរំកិលបង្គោលឡាក់ព្រំដែនចូលជ្រៅក្នុងទឹកដីខ្មែររាប់គីឡូម៉ែត្រ។ សេចក្តីរាយការណ៍ជុំវិញបញ្ហានេះបានកើតឡើងនៅក្នុងខេត្តឧត្តរមានជ័យ បន្ទាយមានជ័យ ប៉ៃលិន និងខេត្តបាត់ដំបង ព្រោះកន្លែងដែលអតីតទាហានខ្មែរក្រហមនិងកម្លាំងអ្នកតស៊ូឈរជើងបច្ចុប្បន្នទាហានសៀមបានធ្វើបន្ទាយឈរជើងយ៉ាងរឹងមាំ។ អាជ្ញាធរខ្មែរនៃខេត្តឧត្តរមានជ័យ បន្ទាយមានជ័យ ប៉ៃលិន និងខេត្តបាត់ដំបងមិនដែលយកចិត្តទុកដាក់ចំពោះសកម្មភាពដែលភាគីសៀមរំកិលបង្គោលព្រំដែនចូលមកក្នុងទឹកដីខ្មែរនោះទេ។លើសនេះទៅទៀតនៅពេលដែលមានសេចក្តីរាយការណ៍ជុំវិញភាគីសៀមរំកិលបង្គោលព្រំដែនចូលក្នុងទឹកដីខ្មែរបែរជាសមត្ថកិច្ច និងមន្ត្រីអាជ្ញាធរនៃបណ្តាខេត្តទាំងនោះចេញមុខអះអាងថាមិនមែនជាការពិតទៅវិញ បើទោះបីមានប្រជាពលរដ្ឋជាសាក្សីរស់អាចបញ្ជាក់អំពីការពិតយ៉ាងណាក៏ដោយ។

ចាប់តាំងពីឆ្នាំ២០០៦ រហូតមករដ្ឋាភិបាលលោក ហ៊ុន សែនយក ចិត្តទុកដាក់យ៉ាងខ្លាំងចំពោះការបោះបង្គោលព្រំដែនគោកជាមួយប្រទេស យួនដោយផ្អែកតាមសន្ធិសញ្ញាបំពេញ បន្ថែមលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ ។ លោក ហ៊ុន សែន ធ្លាប់អះអាងជាសាធារណៈកាលពីខែតុលាការឆ្នាំ ២០០៥ថា ការបោះបង្គោលព្រំដែនដោយផ្អែកតាមសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ អាចធ្វើឱ្យកម្ពុជាចំណេញទឹកដី។ ក៏ប៉ុន្តែចាប់តាំងពីបោះបង្គោលព្រំដែនលេខ១៧១ នៅក្រុងបាវិតខេត្តស្វាយរៀង រហូតដល់សម្ពោធបង្គោលព្រំដែនលេខ៣១៤ នៅព្រំដែនព្រែកចាកខេត្តកំពតមិនទាន់ឃើញកម្ពុជាបានចំណេញទឹកដីពីយួនមួយចំអាមណា ឡើយ។ ផ្ទុយទៅវិញប្រជាពលរដ្ឋខ្មែររស់នៅតាមតំបន់ព្រំដែនបានបញ្ជាក់ការពិតថាការបោះបង្គោលព្រំដែនគោកកម្ពុជា-យួន បណ្តាល ឱ្យពួកគាត់បាត់បង់ដីស្រែកេរដូនតាអស់ជាច្រើនហិកតា ហើយបច្ចុប្បន្នដីខ្មែរក្លាយទៅជាស្រែយួនគួរឱ្យឈឺឆាប់ខ្លាំងណាស់។ ពួកគាត់ធ្លាប់អំពាវ នាវឱ្យរដ្ឋាភិបាលជួយរកដំណោះ ស្រាយ ប៉ុន្តែរដ្ឋាភិបាលបែរជាអះអាង ថាយួនមិនបានរំលោភឈ្លានពានទឹកដីកម្ពុជាតាមព្រំដែនទេ។

រដ្ឋាភិបាលដឹកនាំដោយគណបក្សប្រជាជនកម្ពុជាដែលមានលោក ហ៊ុនសែន ជានាយករដ្ឋមន្ត្រីត្រូវបាន គណបក្សប្រឆាំង ក្រុមសង្គមស៊ីវិល និងសកម្មជនការពារព្រំដែនរិះគន់ថា ធ្វើឱ្យទឹកដីកម្ពុជាត្រូវបាត់បង់បន្ថែមទៀត ទាំងខាងកើតនិងខាងលិចទៅប្រទេសជិតខាង។ ជាក់ស្តែងករណីជម្លោះព្រំដែននៅតំបន់ប្រាសាទព្រះវិហារដែលអូសបន្លាយតាំងពីថ្ងៃទី ១៥ ខែកក្កដា ឆ្នាំ២០០៨រហូតមកដល់ពេលនេះមិនទាន់មានដំណោះ ស្រាយដាច់ស្រេចនៅឡើយទេដោយ សារតែរដ្ឋាភិបាលលោក ហ៊ុន សែន មានជំហរទន់ជ្រាយហួសហេតុជា មួយរដ្ឋាភិបាលសៀម។ កន្លងមកគណបក្សសមរង្ស៊ី ដែលជាគណ បក្សប្រឆាំងធ្លាប់ជំរុញឱ្យរដ្ឋាភិបាលលោក ហ៊ុន សែន ប្រើប្រាស់កិច្ចព្រមព្រៀងសន្តិភាពទីក្រុងប៉ារីសធ្វើជាគោលដើម្បីដោះស្រាយបញ្ហាព្រំដែនជាមួយប្រទេសជិតខាងក៏ប៉ុន្តែរដ្ឋា ភិបាលលោក ហ៊ុន សែន មិនដែលយកចិត្តទុកដាក់អនុវត្តន៍តាមអនុសាសន៍ដ៏មានតម្លៃរបស់គណបក្សប្រឆាំងនោះឡើយ៕

ប្រជាប្រិយភាពនៃវីដេអូឃ្លីបរបស់លោក សម រង្ស៊ី បង្ហាញយ៉ាងច្បាស់ថាមន្ត្រីរាជការនិងកងកម្លាំងប្រដាប់អាវុធទូទៅចង់ផ្លាស់ប្តូរជីវភាពថ្មី

មនសិការខ្មែរ — Sun, 19 May 2013 04:35:01 +0000

ដើម្បីឆ្ពោះទៅកាន់ជ័យជំនះក្នុងការបោះឆ្នោតនាពេលខាងមុខនេះ គណបក្សសង្គ្រោះជាតិបានរៀបចំយុទ្ធសាស្រ្តនយោបាយយ៉ាងល្អប្រសើរ សំដៅលើកស្ទួយជីវភាពរស់នៅរបស់ប្រជារាស្រ្តខ្មែរទូទៅដូចដែលវីដេអូឃ្លីបរបស់លោកប្រធាន សម រង្ស៊ី ស្តីអំពីការដំឡើងប្រាក់ខែជូនមន្ត្រីរាជការ កងកម្លាំងប្រដាប់អាវុធ និងកម្មករឲ្យមានជីវភាពរស់នៅសមរម្យនិងថ្លៃថ្នូរ គ្រាន់ តែរយៈពេល១សប្តាហ៍ប៉ុណ្ណោះ មានអ្នកមើលរហូតដល់ទៅរាប់លាននាក់ គឺបង្ហាញយ៉ាងច្បាស់ថា ប្រជាពលរដ្ឋខ្មែរទូទៅចង់ផ្លាស់ប្តូរជីវភាពថ្មី ឆ្ពោះទៅកាន់ភាពល្អប្រសើរជាងពេលបច្ចុប្បន្ននេះ។ ជាការពិតចលនាភ្ញាក់រលឹកវិលមករួបរួមជាមួយគណបក្សសង្គ្រោះជាតិ ប្រៀបដូចជាដុំផ្ទាំងទឹក កកដែលបាក់រអិលចូលក្នុងសមុទ្រគួរឲ្យចាប់អារម្មណ៍បំផុត មិនអាចមាននរណាទប់ស្កាត់បានឡើយ បើទោះបីជាលោកនាយករដ្ឋមន្ត្រី ហ៊ុន សែន ព្យាយាមបំភិតបំភ័យរករឿងនិងរារាំង ប្រជារាស្រ្តខ្មែរមិនឲ្យមកចូលរួមស្តាប់សារនយោបាយរបស់គណបក្សសង្គ្រោះជាតិក៏ដោយព្រោះការដឹកនាំរបស់លោក ហ៊ុន សែន អស់រយៈពេល៣០ឆ្នាំកន្លងមកនេះ ធ្វើឲ្យប្រជារាស្រ្តខ្មែរទូទៅ ជួបតែទុក្ខវេទនានិងភាពក្រីក្ររកទីបំផុតគ្មាន ទើបគ្រប់ៗគ្នាបង្ហាញឲ្យឃើញពីអាកប្បកិរិយា ស្រេកឃ្លានក្នុងការផ្លាស់ប្តូរមេដឹកនាំថ្មីឱ្យទាន់ពេលវេលា។

វីដេអូឃ្លីបរបស់លោកប្រធាន សម រង្ស៊ី រយៈពេល២នាទី បានលើកឡើងអំពីការលុបបំបាត់អំពើពុករលួយដែលផ្តើមចេញពីការរត់ពន្ធទំនិញខុសច្បាប់ ធ្វើឲ្យខាតបង់ចំណូលថវិកាជាតិ គឺអាចប្រមូលធនធានថវិកាយកមកដំឡើងប្រាក់ខែជូនមន្ត្រីរាជការ កងកម្លាំងប្រដាប់អាវុធឲ្យបាន១លានរៀលក្នុងមួយខែ ហើយកម្មករអាចទទួលបានប្រាក់ខែចំនួន ៦០ ម៉ឺនរៀល រួមជាមួយប្រាក់អត្ថប្រយោជន៍ផ្សេងៗទៀត។ ដោយឡែក បុគ្គលិកនៅតាមក្រុមហ៊ុនឯកជនគ្រប់វិស័យទាំងអស់អាច ទទួលបានប្រាក់ខែទាបបំផុតចំនួន៦០ម៉ឺនរៀល ពោលគឺគោលនយោបាយរបស់គណបក្សសង្គ្រោះជាតិ ក្នុងការលើកកម្ពស់ជីវភាពរស់នៅប្រចាំថ្ងៃរបស់ប្រជារាស្រ្តខ្មែរទូទៅ ទទួលបានការគាំទ្រយ៉ាងភ្លូកទឹកភ្លូកដីហើយតាមរយៈចរន្តប្រវត្តិសាស្រ្តដែលសហគមន៍អន្តរជាតិកំពុងយកចិត្តទុកដាក់ជំរុញឲ្យមានការបោះឆ្នោតដោយសេរី យុត្តិធម៌ ស្របតាមគោលការណ៍នៃលទ្ធិប្រជាធិបតេយ្យ គេតែងតែរំពឹងទុកថាបក្សសង្គ្រោះជាតិអាចឈ្នះឆ្នោតនិងផ្តួលអំណាចដ៏យូរអង្វែងរបស់លោក ហ៊ុន សែន តាមរយៈការបោះឆ្នោតជាតិអាណត្តិទី៥ ថ្ងៃទី២៨ ខែកក្កដាខាងមុខ។

លោកប្រធាន សម រង្ស៊ី បានថ្លែងប្រាប់ជនរួមឈាមខ្មែរទូទៅថា នៅពេលដែលសហគមន៍អន្តរជាតិ បានជួយជ្រោមជ្រែងនិងដាក់សម្ពាធឲ្យអ្នកកាន់អំណាចនៅស្រុកខ្មែរធានា រៀបចំការបោះឆ្នោតដោយសេរី និងយុត្តិធម៌បញ្ហាសំខាន់មួយទៀតគឺ យើងត្រូវតែជួយខ្លួនឯង ទើបសង្ឃឹមថាអ្នកស្នេហាជាតិនិងអ្នកស្រឡាញ់លទ្ធិប្រជាធិបតេយ្យអាច ទទួលបានជោគជ័យយ៉ាងភ្លូកទឹកភ្លូកដី តាមរយៈការបោះឆ្នោតនាពេលខាងមុខនេះ។ លោកប្រធាន សម រង្ស៊ី បានរំលឹកទៀតថា យុទ្ធសាស្ត្ររបស់ក្រុមអ្នកកាន់អំណាចដែលមានរបៀបដឹកនាំតាមបែបកុម្មុយនិស្ត គេបំបែក បំបាក់យើង គេប្រើមធ្យោបាយគ្រប់បែបយ៉ាងដូចជា សម្លុត ទិញ ដើម្បីបំបែកបំបាក់អ្នកស្នេហាជាតិ ហើយ បើយើងបែកបាក់គ្នា យើងនឹងចុះទន់ ខ្សោយ គេចូលមកត្រួតត្រាគ្រប់គ្រងយើង។ ប៉ុន្តែកាលៈទេសៈនេះយើង ជាខ្មែរទាំងអស់គ្នា យើងបានដឹងខ្លួន បានប្តេជ្ញាចិត្តដែលបានរួបរួមសាមគ្គីគ្នាបំពេញបេសកកម្មសង្គ្រោះ ប្រទេសជាតិយើង ដូច្នេះការរួបរួមគ្នានាំឲ្យបក្សសង្គ្រោះជាតិខ្លាំង ហើយឆ្ពោះទៅកាន់ជ័យជំនះធំធេង តាមរយៈការបោះឆ្នោតនាពេលខាងមុខនេះ។

លោកប្រធាន សម រង្ស៊ី បានរំលឹកទៀតថាមានដំណឹងល្អសម្រាប់ ជនរួមឈាមខ្មែរទាំងមូលគឺ នៅក្នុងប្រទេសកម្ពុជា ប្រជាពលរដ្ឋខ្មែរនៅ គ្រប់ទិសទី តាំងពីជនបទរហូតដល់ ទីប្រជុំជន បាននាំគ្នាគាំទ្រគណបក្សសង្គ្រោះជាតិ យ៉ាងភ្លូកទឹកភ្លូកដី ព្រោះជាគណបក្សមួួយដែលកើតចេញពីមហាសាមគ្គីភាពដ៏រឹងមាំរវាងគណបក្ស សម រង្ស៊ី និងគណបក្សសិទ្ធិមនុស្ស ហើយមានសមាជិក និងឥស្សរជនមកពីគណបក្សផ្សេងៗជាច្រើនទៀត បានកំពុងនិងត្រៀមខ្លួនចូលរួមគាំទ្របក្សសង្គ្រោះជាតិ កាន់តែច្រើនឡើងៗធ្វើឲ្យចលនានយោបាយរបស់អ្នកប្រជាធិបតេយ្យនៅកម្ពុជា កាន់តែផុសផុុលពីមួយថ្ងៃទៅមួយថ្ងៃ ហើយយើងសង្ឃឹមថាអាចទទួលបានជោគជ័យក្នុងការបោះឆ្នោតនាពេលខាងមុខនេះ។ លោកប្រធាន សម រង្ស៊ី បានសម្តែងក្តីរំភើបរីករាយយ៉ាងខ្លាំង ដោយចាត់ទុកថា ស្ថានភាពអំណោយផលបែបនេះលោកមិនដែលបានឃើញពីមុនមកទេ គឺចរន្តរាស្ត្រនៅថ្នាក់មូលដ្ឋាន បានភ្ញាក់រលឹកមកគាំទ្រអ្នកប្រជាធិបតេយ្យ កម្លាំងអ្នកស្នេហាជាតិ គឺរយៈពេល ២០ឆ្នាំហើយ មិនដែលមានរូបភាពបែបនេះទេ។ ដូចដែលអ្នកសង្កេតការណ៍ជាច្រើនបានមើលឃើញពីចរន្ត ពីទឹកចិត្ត និងសកម្ម ភាពដ៏ផុសផុលរបស់ប្រជារាស្ត្រខ្មែរទូទៅដែលនាំគ្នាមកគាំទ្រគណបក្ស សង្គ្រោះជាតិ យ៉ាងគគ្រឹកគគ្រេង ដែលជាសញ្ញាមួយធ្វើឲ្យគ្រប់ៗគ្នាមានជំនឿយ៉ាងមុតមាំអំពីជ័យជំនះ ក្នុងការបោះឆ្នោត។

លោកប្រធាន សម រង្ស៊ី បានលើកឡើងទៀតថា នៅពេលដែលខ្មែរចេះរួបរួមសាមគ្គីគ្នា គឺខ្មែរនឹងទទួលបានជ័យជំនះ ហើយកន្លងមក ខ្មែរធ្លាប់បែកបាក់គ្នា នាំឲ្យខ្មែរចាញ់ ខ្មែរត្រូវគេធ្វើបាប តែនៅឆ្នាំ២០១៣នេះ ខ្មែរបានរួបរួមគ្នា ខ្មែរនឹងឈ្នះ ខ្មែរនឹងរស់ ខ្មែរនឹងរុងរឿងថ្កុំថ្កើង ដោយសារតែការរួបរួមគ្នាហើយជនរួមឈាមខ្មែរនៅក្រៅប្រទេសក៏ ដូចគ្នានេះដែរ បាននាំគ្នាពពាក់ពពូនមក គាំទ្រគណបក្សសង្គ្រោះជាតិ ហើយបានចំណាយធនធានថវិកាប្រកបដោយទឹកចិត្តជ្រះថ្លា រួមចំណែកក្នុង ការបំពេញបេសកកម្មដើម្បីរំដោះប្រទេសជាតិយើង ឲ្យរួចផុតពីគ្រោះថ្នាក់និងការដឹកនាំមិនត្រឹមត្រូវ។ លោកប្រធាន សម រង្ស៊ី ក៏បានកត់សម្គាល់ផងដែរថា តំណាងគណបក្ស សម រង្ស៊ី នៅថ្នាក់មូល ដ្ឋាននិងថ្នាក់ស្រុកខណ្ឌជាច្រើនរកពេលទំនេរសឹងគ្មាន មួយថ្ងៃៗនាំគ្នាចុះបំពេញភារកិច្ច ជួយដោះស្រាយទុក្ខលំបាកនិងស្តាប់សំណូមពរប្រជារាស្ត្រ ដែលកំពុងរងនូវការធ្វើទុក្ខបុកម្នេញ ពីសំណាក់អាជ្ញាធរអ្នកកាន់អំណាច។ ពេលខ្លះតំណាងនៅតាមមូលដ្ឋានបាននាំគ្នាឡើងមកប្រជុំទទួលយកផែនការ និងយុទ្ធសាស្ត្រពីថ្នាក់លើ ចុះទៅដល់មូលដ្ឋានវិញ បានអនុវត្តន៍សកម្មភាពការងារជាក់ស្តែងជួបជាមួយពលរដ្ឋ ដើម្បីប្រមូលកម្លាំងគាំទ្រ សឹងថារកពេលហូបបាយគ្មាន គឺសកម្មខ្លាំងណាស់ហើយ លោកប្រធាន សម រង្ស៊ី ក៏មានមោទនភាពយ៉ាងជ្រាលជ្រៅបំ ផុតចំពោះទឹកចិត្តរបស់ជនរួមឈាមខ្មែរ ដែលនាំគ្នាគាំទ្រគណបក្សសង្គ្រោះជាតិកាន់តែច្រើនឡើងៗ។

តាមរបាយការណ៍ដែលទទួលបានលោកប្រធាន សម រង្ស៊ី ក៏បានរំលឹកផងដែរថា តំណាងគណបក្ស សម រង្ស៊ី នៅថ្នាក់មូលដ្ឋានជាច្រើន បានទំនាក់ទំនងជាមួយកម្លាំងស្នូលរបស់ក្រុមអ្នកកាន់អំណាចដូចជាមេភូមិ មេឃុំ ជាដើម ជាពិសេសមេក្រុមមាន មេផ្ទះ១០ខ្នង២០ខ្នង ឬមេផ្ទះ៥០ខ្នង រាប់ទាំងកូនប៉ូលិស រហូតដល់មន្ត្រីធំៗមួយចំនួនទៀត ដែលពីមុនមកគេមិនដែលហ៊ានចេញមុខនោះទេប៉ុន្តែក្នុងឆ្នាំ២០១៣ នេះ គ្រប់ៗគ្នាមានភាពក្លាហានហ៊ានសម្តែងឆន្ទៈពិតប្រាកដរបស់ពួកគេ មកចូលរួមជាមួយគណបក្សសង្គ្រោះជាតិ ទាំងរូបភាពចំហ ក៏ដូចជារូបភាពលាក់មុខ ក៏ព្រោះតែក្រុមមន្ត្រីដែលជាកម្លាំងស្នូលរបស់គណបក្សកាន់អំណាចអស់ទាំងនោះមានជំនឿ ថា ក្រុមអ្នកប្រជាធិបតេយ្យនិង អ្នកស្នេហាជាតិ ពិតជាអាចយកជ័យជំនះ លើការបោះឆ្នោត ផ្តួលអំណាចលោក ហ៊ុន សែន ដោយជោគជ័យ។ ដូច្នេះហើយបានជាគេមើលឃើញកាន់តែច្បាស់ថា ការវិលមករួបរួមរបស់់ប្រជាពលរដ្ឋ មន្ត្រីរាជការ និងកងកម្លាំងប្រដាប់អាវុធដែលធ្លាប់តែគាំទ្របក្សប្រជាជនកម្ពុជា ហើយពួកគេអស់ជំនឿមកគាំទ្រគណបក្សសង្គ្រោះជាតិវិញគឺជាសញ្ញាដ៏សំខាន់បំផុតបង្ហាញថាខ្មែរស្នេហាជាតិ និងអ្នកប្រជាធិបតេយ្យដែលកំពុងរួបរួមសាមគ្គីគ្នាដ៏រឹងមាំជាមួយ គណបក្សសង្គ្រោះជាតិ អាចទទួលជោគជ័យយ៉ាងភ្លូកទឹកភ្លូកដី គឺជាជោគជ័យប្រវត្តិសាស្ត្រដែលយើងមិនអាចស្មានដល់។

លោកប្រធាន សម រង្ស៊ី បានធ្វើការប្រៀបធៀបថា ចលនាបំបែកខ្លួនរបស់មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋពីគណបក្សកាន់អំណាច វិលមករួបរួមជាមួយបក្សសង្គ្រោះជាតិ គឺមានរូបភាព ស្រដៀងនឹងផ្ទាំងទឹកកកដែលចាប់ផ្តើមរលាយហើយបាក់ទាំងផ្ទាំងៗ ហូរចូលផ្ទៃសមុទ្រ ហើយការលើកឡើងពីខាងដើមនេះ លោកប្រធាន សម រង្ស៊ី មិនបានរំលឹកដល់មន្ត្រីនិងសកម្មជនមកពីគណបក្សនយោបាយផ្សេងៗទៀត ដូចជាគណបក្ស ហ្វុ៊នស៊ិនបិុច អីនោះទេ ព្រោះចលនាដែលមកចូលរួមជាមួយគណបក្សសង្គ្រោះជាតិមានច្រើនខ្លាំងណាស់ មកពីគ្រប់គណបក្សនយោបាយទាំងអស់។ ស្ថានការណ៍បែបនេះ យើងត្រូវតែនាំគ្នាអបអរសាទរ ហើយប្រជាពលរដ្ឋខ្មែរនៅក្នុងប្រទេសកំពុងរួបរួមគ្នាដើម្បីយកជំនះ ដោយឡែក ជនរួមឈាមខ្មែរនៅឯនាយសមុទ្រក៏ជាផ្នែកមួយដ៏សំខាន់ក្នុងការបំពេញ បេសកកម្មរំដោះប្រទេសកម្ពុជាឲ្យរួច ផុតពីគ្រោះថ្នាក់ផងដែរព្រោះយើងមានឈាមជ័រជាខ្មែរ និងមានភាសាតែមួយ គឺខ្មែរនៅឯនាយសមុទ្រត្រូវតែមានកាតព្វកិច្ចដូចខ្មែរនៅក្នុងប្រទេស ផងដែរ។ ការរួបរួមគ្នាដ៏រឹងមាំបែបនេះ ធ្វើឲ្យក្រុមអ្នកកាន់អំណាចភ័យខ្លាច មិនហ៊ានធ្វើការកែទម្រង់ប្រព័ន្ធបោះឆ្នោត និងនីតិវិធីនៃការរៀបចំបោះឆ្នោតស្របតាមអនុសា សន៍របស់ លោក សុរិយា ស៊ូប៊ែរឌី នោះទេហើយ ប្រសិនបើមានការរៀបចំការបោះឆ្នោតដោយសេរី និងយុត្តិធម៌ តាមសម្ពាធរបស់អន្តរជាតិគឺសំឡេងគាំទ្រគណបក្សសង្គ្រោះជាតិអាចកើនឡើងដល់ទៅ ២ឬ៣ដងឯណោះ ព្រោះអ្នកសេ្នហាជាតិទឹកដី អ្នកស្រឡាញ់យុត្តិធម៌ និងអ្នកស្អប់ខ្ពើមអំពើពុករលួយ នឹងបោះឆ្នោត គាំទ្រគណបក្សសង្គ្រោះជាតិ៕

ពន្យារពេលបោះឆ្នោតប្រសើរជាងការបោះឆ្នោតដោយលួចបន្លំបំភ្លៃឆន្ទៈពលរដ្ឋខ្មែរ

មនសិការខ្មែរ — Sat, 18 May 2013 05:19:17 +0000

ក្នុងខណៈដែលការបោះឆ្នោតជាតិអាណត្តិទី៥ ថ្ងៃទី២៨ ខែកក្កដា ឆ្នាំ២០១៣ កាន់តែខិតជិតមកដល់ លោក សម រង្ស៊ី ប្រធានគណបក្សសង្គ្រោះជាតិបានអំពាវនាវឱ្យមានអន្តរាគមន៍ពីសហរដ្ឋអាមេរិក និងពីសហគមន៍អន្តរជាតិបន្ថែមទៀត ដើម្បីឱ្យមានការបោះឆ្នោតមួយប្រព្រឹត្តទៅដោយសេរីត្រឹមត្រូវ និងយុត្តិធម៌។ ក្នុងកិច្ចពិភាក្សាជាមួយមន្ត្រីអាមេរិក និងអ្នកចូលរួមជាច្រើនក្នុងរដ្ឋធានីវ៉ាស៊ីនតោន លោក សម រង្ស៊ីបានសង្កត់ធ្ងន់ថាប្រសិនបើសហគមន៍អន្តរជាតិមិនធ្វើអន្តរាគមន៍ទេ នោះសហគមន៍អន្តរជាតិ នឹងបាត់បង់កេរ្តិ៍ឈ្មោះក្នុងការជួយដោះស្រាយបញ្ហានយោបាយក្នុងប្រទេសដទៃទៀត។ លោក សម រង្ស៊ី ប្រធានគណបក្សសង្គ្រោះជាតិដែលកំពុងមានការគាំទ្រពីប្រជាពលរដ្ឋខ្មែរកាន់តែច្រើនឡើងៗ បានបញ្ជាក់ថាសហរដ្ឋអាមេរិក និងសហគមន៍អន្តរជាតិត្រូវតែបន្ថែមសម្ពាធរបស់ខ្លួនក្នុងការស្តារដំណើរការលទ្ធិប្រជាធិបតេយ្យក្នុងប្រទេសកម្ពុជាទាក់ទៅនឹងការផ្លាស់ប្តូរប្រព័ន្ធបោះឆ្នោត រៀបចំបោះឆ្នោតឱ្យមានលក្ខណៈសេរី យុត្តិធម៌ត្រឹមត្រូវ និងមានការចូលរួមពីរូបលោកនៅក្នុងការបោះឆ្នោតខាងមុខ។ ក្នុងឱកាសធ្វើជាវាគ្មិនរបស់អង្គការតាក់តែងគោលនយោបាយសហរដ្ឋអាមេរិកមួយឈ្មោះមជ្ឈមណ្ឌលវីលសុនក្នុងរដ្ឋធានីវ៉ាស៊ីនតោន កាលពីថ្ងៃពុធ លោក សម រង្ស៊ី បានថ្លែងទៅកាន់អ្នកចូលរួមប្រមាណ១០០នាក់ មកពីរដ្ឋាភិបាល និងអង្គការធំៗរបស់សហរដ្ឋអាមេរិក ដោយលើកឡើងថាការទទួលខុសត្រូវរបស់សហគមន៍អន្តរជាតិចំពោះប្រទេសកម្ពុជាដែលកំពុងដើរថយក្រោយផ្នែកលទ្ធិប្រជាធិបតេយ្យជារឿងសំខាន់ ជាពិសេសរយៈពេលតែជាង២ខែ ដែលការបោះឆ្នោតឈានចូលមកដល់។ ដំណើរការលទ្ធិប្រជាធិបតេយ្យនៅកម្ពុជាធ្លាក់ចេញពីផ្លូវ ដូច្នេះវាជារឿងចាំបាច់ក្នុងការធ្វើឱ្យដំណើរការទាំងឡាយដើរតាមផ្លូវប្រជាធិបតេយ្យឡើងវិញឱ្យបានត្រឹមត្រូវ។

លោក សម រង្ស៊ី ប្រធានគណបក្សសង្គ្រោះជាតិដែលជាការរួមកម្លាំងគ្នារវាងគណបក្សសមរង្ស៊ី និងគណបក្សសិទ្ធិមនុស្សកំពុងក្លាយជាបេក្ខជនតែម្នាក់គត់ដែលមានលទ្ធភាពប្រកួតប្រជែងជាមួយលោក ហ៊ុន សែន បេក្ខជននាយករដ្ឋមន្ត្រី មកពីគណបក្សប្រជាជនកម្ពុជា។ លោក សម រង្ស៊ី បានចោទប្រកាន់គណបក្សគ្រប់គ្រងអំណាចសព្វថ្ងៃនេះថាបានយកប្រព័ន្ធតុលាការមកប្រើប្រាស់ដើម្បីបំបាត់សំឡេងរបស់លោក និងរារាំងមិនឱ្យរូបលោកចូលរួមក្នុងការបោះឆ្នោតដោយសារតែរឿងដកតម្រុយបង្គោលព្រំដែនកម្ពុជា-យួន កាលពីឆ្នាំ២០០៩។ លោក សម រង្ស៊ី បានថ្លែងថាសហគមន៍អន្តរជាតិមិនអាចនៅស្ងៀមបានទេ ហើយត្រូវតែធ្វើអន្តរាគមន៍ឱ្យបានខ្លាំងក្លាមុនការបោះឆ្នោតថ្ងៃទី២៨ ខែកក្កដា ឆ្នាំ២០១៣ឱ្យស្របទៅនឹងអ្វីដែលជាការធានានៅក្នុងកិច្ចព្រមព្រៀងសន្តិភាពទីក្រុងប៉ារីស។ លោកបានបញ្ជាក់ថា “ប្រសិនបើពិភពលោកទាំងមូលបិទភ្នែកហើយគ្មានប្រតិកម្ម ខ្ញុំគិតថាកេរ្តិ៍ឈ្មោះរបស់ពិភពលោក និងសហគមន៍អន្តរជាតិ នឹងធ្លាក់ចុះដល់កម្រិតសូន្យក្នុងការស្វែងរកដំណោះស្រាយនយោបាយសម្រាប់ប្រទេសដទៃទៀត”។

សូមបញ្ជាក់ថាសហគមន៍អន្តរជាតិរួមទាំងសហរដ្ឋអាមេរិក បានជំរុញឱ្យកម្ពុជាកែប្រែប្រព័ន្ធបោះឆ្នោត និងអនុញ្ញាតឱ្យលោក សម រង្ស៊ី បានចូលរួមប្រកួតប្រជែងក្នុងការបោះឆ្នោត បើពុំដូច្នេះទេរដ្ឋាភិបាលថ្មីនឹងជួបប្រទះនូវវិបត្តិគ្មានការទទួលស្គាល់ពីភាពស្របច្បាប់ ហើយអាចនាំទៅដល់ការកាត់ជំនួយផ្សេងៗ។ លោក ចច ហ្គ័រមែន អ្នកវិភាគនយោបាយក្នុងតំបន់អាស៊ីនៃអង្គការ Cascade Asia បានហៅការដាក់សម្ពាធឬការគំរាមរបស់សហគមន៍អន្តរជាតិជាច្រើនឆ្នាំក្នុងការរៀបចំបោះឆ្នោតឱ្យមានលក្ខណៈសេរី និងយុត្តិធម៌ថា គ្មានបានការហើយកាន់តែធ្វើឱ្យលោក ហ៊ុន សែន មានទំនុកចិត្តថែមទៀត។ ដូច្នេះសហគមន៍អន្តរជាតិពុំបានចាត់វិធានការជាជំហានស្ថាបនាទេ ដើម្បីពង្រឹងការគំរាមរបស់ខ្លួនដែលចង់ដាក់សម្ពាធលើរដ្ឋាភិបាលកម្ពុជានោះ។ អ្នកស្រី ស៊ីហូកូ ហ្គោតូអ្នកសម្របសម្រួលកម្មវិធី និងជាអ្នកស្រាវជ្រាវនៃមជ្ឈមណ្ឌលវីលសុនបានអះអាងថាការអនុញ្ញាតឱ្យលោក សម រង្ស៊ី មកបង្ហាញទស្សនៈរបស់លោក និងឱ្យមានការពិភាក្សាគឺដើម្បីឱ្យមានការយល់ដឹងពីស្ថានការណ៍នយោបាយបច្ចុប្បន្នក្នុងប្រទេសកម្ពុជា ជាមួយមន្ត្រីរដ្ឋាភិបាលក្រុងវ៉ាស៊ីនតោន។ អ្នកស្រីបានរិះគន់ថាប្រទេសកម្ពុជាសព្វថ្ងៃគឺជាប្រទេសដែលមិនអនុញ្ញាតឱ្យមានការពិភាក្សាស៊ីជម្រៅទេ ហើយសិទ្ធិសេរីភាពបញ្ចេញមតិនៅក្នុងប្រទេសកម្ពុជានៅមានចំណុចខ្វះខាតជាច្រើន។

ប្រទេសកម្ពុជា នឹងធ្វើការបោះឆ្នោតជាតិអាណត្តិទី៥ នៅថ្ងៃទី២៨ ខែកក្កដាខាងមុខ ប៉ុន្តែគណបក្សប្រឆាំង និងមន្ត្រីសង្គមស៊ីវិលបានរិះគន់ថាគណៈកម្មាធិការជាតិរៀបចំការបោះឆ្នោត (គ.ជ.ប) បានលំអៀងទៅរកគណបក្សប្រជាជនកម្ពុជារបស់លោក ហ៊ុន សែន ដែលគ្រប់គ្រងអំណាចជាង ៣៤ឆ្នាំមកហើយ។ គណបក្សប្រឆាំងបានធ្វើការទាមទារជាបន្តបន្ទាប់ឱ្យមានការកែទម្រង់ប្រព័ន្ធបោះឆ្នោត និងសមាសភាពថ្នាក់ដឹកនាំគណៈកម្មាធិការជាតិរៀបចំការបោះឆ្នោត ស្របទៅតាមអនុសាសន៍របស់លោក សុរិយា ស៊ូប៊ែរឌី អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា។ លោក សម រង្ស៊ី មេដឹកនាំគណបក្សសង្គ្រោះជាតិបានអំពាវនាវឱ្យសហរដ្ឋអាមេរិកដាក់សម្ពាធលើរដ្ឋាភិបាលលោក ហ៊ុន សែន ដើម្បីធ្វើយ៉ាងណាឱ្យការបោះឆ្នោតខែកក្កដាខាងមុខប្រព្រឹត្តទៅដោយសេរីត្រឹមត្រូវ និងយុត្តិធម៌។ លោក សម រង្ស៊ី សង្ឃឹមថាសភាសហរដ្ឋអាមេរិកទាំងមូលនឹងបង្កើនសម្ពាធរបស់ខ្លួនលើរដ្ឋាភិបាលលោក ហ៊ុន សែន ឱ្យមានការកែទម្រង់ប្រព័ន្ធបោះឆ្នោតក្នុងប្រទេសកម្ពុជា និងជំរុញឱ្យមានការវិលត្រឡប់របស់លោកមកចូលរួមពេញលេញនៅក្នុងការបោះឆ្នោតថ្ងៃទី២៨ ខែកក្កដាខាងមុខ។

លោក សម រង្ស៊ី ក្នុងនាមជាវាគ្មិននៃវេទិកាអាស៊ីរបស់មជ្ឈមណ្ឌលវីលសុន បានបញ្ជាក់ថាប្រសិនបើគ្មានអ្វីកើតឡើងតាមការទាមទាររបស់សហគមន៍អន្តរជាតិ និងសហរដ្ឋអាមេរិកទេនោះ គឺសហរដ្ឋអាមេរិកត្រូវតែមានប្រតិកម្ម ព្រោះប្រតិកម្មខ្លាំងក្លារបស់សហរដ្ឋអាមេរិក នឹងជួយជំរុញឱ្យលោក ហ៊ុន សែន ទទួលយកការទាមទាររបស់សហគមន៍អន្តរជាតិនៅពេលនេះ គឺមិនមែននៅក្រោយពេលបោះឆ្នោតទេ។ លោក សម រង្ស៊ី បានអះអាងថាលោកអាចទទួលយកបានចំពោះការពន្យារពេលបោះឆ្នោត ដើម្បីរៀបចំប្រព័ន្ធបោះឆ្នោត និងការបោះឆ្នោតឱ្យបានត្រឹមត្រូវ មិនមែនជាការបោះឆ្នោតកេងបន្លំ។ លោក សម រង្ស៊ី បានបញ្ជាក់ទៀតថាការធ្វើយ៉ាងដូច្នេះគឺដើម្បីចៀសវាងបញ្ហាអំពើហិង្សាយ៉ាងធ្ងន់ធ្ងរដូចដែលអ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោក សុរិយា ស៊ូប៊ែរឌី បានបង្ហាញយ៉ាងច្បាស់ក្នុងរបាយការណ៍កាលពីចុងឆ្នាំមុន។ ជាងនេះទៅទៀតលោក សម រង្ស៊ី ក៏បានផ្តល់ជម្រើសដល់មន្ត្រីរដ្ឋាភិបាលបច្ចុប្បន្នផងដែរ គឺនៅពេលគណបក្សសង្គ្រោះជាតិឈ្នះឆ្នោត នឹងធានាដល់សុវត្ថិភាពសម្រាប់ការរស់នៅក្នុងស្រុក ឬរស់នៅក្រៅប្រទេស ប្រសិនបើពួកគេលាលែង ឬដើរចេញពីអំណាចដោយសន្តិវិធីក្រោយពេលចាញ់ឆ្នោត។

ក្រុមអ្នកតាមដានស្ថានការណ៍នយោបាយក្នុងប្រទេសកម្ពុជា បានលើកឡើងថា សំណើរបស់លោក សម រង្ស៊ី ជំរុញឱ្យសហរដ្ឋអាមេរិក និងសហគមន៍អន្តរជាតិដាក់សម្ពាធលើរដ្ឋាភិបាលលោក ហ៊ុន សែន ដើម្បីឱ្យមានការបោះឆ្នោតដោយសេរីត្រឹមត្រូវ និងយុត្តិធម៌ គឺជារឿងត្រឹមត្រូវស្របតាមគោលការណ៍ប្រជាធិបតេយ្យ។ ក្នុងនោះដើម្បីឱ្យការបោះឆ្នោតប្រព្រឹត្តទៅដោយសេរីត្រឹមត្រូវ និងយុត្តិធម៌ គឺទាល់តែមានការកែទម្រង់ប្រព័ន្ធបោះឆ្នោត និងផ្លាស់ប្តូរសមាសភាពថ្នាក់ដឹកនាំ គ.ជ.ប ព្រមទាំងរៀបចំឡើងវិញនូវសមាសភាពមន្ត្រីរៀបចំការបោះឆ្នោតតាំងពីថ្នាក់ជាតិរហូតដល់រាជធានី-ខេត្ត និងឃុំ-សង្កាត់។ ប្រសិនបើពុំមានការកែទម្រង់ប្រព័ន្ធបោះឆ្នោត និងពុំមានការផ្លាស់ប្តូរសមាសភាពថ្នាក់ដឹកនាំ គ.ជ.ប ទេនោះ គឺការបោះឆ្នោតមិនអាចប្រព្រឹត្តទៅដោយសេរីត្រឹមត្រូវ និងយុត្តិធម៌បានឡើយ។ ហេតុនេះហើយទើបគណបក្សសង្គ្រោះជាតិមានគម្រោងធ្វើមហាបាតុកម្មលើកទី២ នៅថ្ងៃទី២០ ខែឧសភា ឆាប់ខាងមុខនេះដើម្បីទាមទារឱ្យមានការកែទម្រង់ គ.ជ.ប និងនីតិវិធីរៀបចំបោះឆ្នោត ព្រោះ គ.ជ.ប បច្ចុប្បន្នត្រូវបានគេដឹងថាជាឧបករណ៍របស់គណបក្សកាន់អំណាច ហើយប្រើគ្រប់វិធីដើម្បីជួយដល់គណបក្សកាន់អំណាច តាមរយៈការបោះឆ្នោតដែលមានភាពមិនប្រក្រតីយ៉ាងពេញបន្ទុក៕

MoneaksekarMoneaksekar

ការ​បោះ​ឆ្នោត​​រើស​មេដឹកនាំ​ល្អ​​ជា​រឿងសំ​ខាន់​បំផុត​​សម្រាប់​​ប្រជាពលរដ្ឋ​ខ្មែរ​​

លោក ឯក សឿន និ​ងលោក គឹម ពិសី​ ​​រក​ចំណូល​ឲ្យ​ថ្នាក់​លើ​ទំនង​ជា​មិនជួប​វាសនា​អាក្រក់នោះទេ​

ពន្យារពេល​បោះឆ្នោត​​ប្រ​សើរ​ជាង​​ការ​បោះ​ឆ្នោត​​ដោយ​លួច​បន្លំ​​បំភ្លៃ​ឆន្ទៈ​ពលរដ្ឋ​ខ្មែរ

ការបោះឆ្នោតរើសមេដឹកនាំល្អជារឿងសំខាន់បំផុតសម្រាប់ប្រជាពលរដ្ឋខ្មែរ

លោក ឯក សឿន និងលោក គឹម ពិសី រកចំណូលឲ្យថ្នាក់លើទំនងជាមិនជួបវាសនាអាក្រក់នោះទេ

ពន្យារពេលបោះឆ្នោតប្រសើរជាងការបោះឆ្នោតដោយលួចបន្លំបំភ្លៃឆន្ទៈពលរដ្ឋខ្មែរ